Internet wobmjezować?
Kontrowersna diskusija wo wuprajenjach předsydki CDU Karrenbauer
Berlin (dpa/SN). Komisar EU Günther Oettinger (CDU) je wobchadźenje swojeje strony z widejom youtubera Reza kritizował a sej womłodźenje strony žadał. „Cool a młoda, to njeje žana špatna kombinacija“, rjekny 65lětny Oettinger tydźenikej Die Zeit. Dlijaca so wotwobaranska akcija CDU bě po jeho měnjenju „zmylk. Dźe wo spěšnosć.“
To a tamne (29.05.19)
Ze 4,15 promilemi alkohola w kreji bě 64lětna žona w porynsko-pfalcskim Bitburgu z awtom po puću a je dalše jězdźidła wobškodźiła. Swědcy wołachu policiju, kotraž móžeše nócnu jězbu žony skónčnje zadźeržeć a dowjeze natutkanu šoferku do chorownje. Tam njemóžeše wona hižo rjec, kotru čaru bě jěła. Wobsadce dweju policajskeju awtow zwěsćištej na to we wokolinje wjacore wobškodźene awta. Škoda njeje znata.
Hłowa žony leži w kamorje policajskeje straže w delnjosakskim Göttingenje a čaka na swojeho wobsedźerja. Pěšk bě před dnjemi z kreju wopancanu žonjacu hłowu na łuce namakał a hrózbnu namakanku policiji zdźělił. Zastojnicy spěšnje pytnychu, zo jedna so wo chětro derje napodobnjenu čłowječu hłowu, a wzachu ju sobu na stražu. Nětko proša ludźi wo pokiwy, komu móhła namakanka słušeć.
Pytaja za nowym nawodu EU
Brüssel (dpa/SN). Dwaj dnjej po wólbach Europskeho parlamenta chcyše zwjazkowa kanclerka Angel Merkel (CDU) dźensa wječor zhromadnje ze swojimi europskimi kolegami na wurjadnym posedźenju wo nowym nawodnistwje Europskeje unije wuradźować. Spočatnje chcychu wo načolnym zastojnstwje w komisiji rěčeć. Wo naslědnistwo šefa komisije Jeana-Claudea Junckera prócuje so Němc Manfred Weber. Wón je načolny kandidat EVP, ma pak wjele přećiwnikow.
AKK diskusije zbudźiła
Berlin (dpa/SN). Předsydka CDU Annegret Kramp-Karrenbauer je ze swojimi namjetami za prawidła nastupajo „šěrjenje měnjenjow“ w interneće za čas wólbneho boja razne diskusije zbudźiła. Tak jej wumjetuja, zo chcyła swobodu měnjenja wobmjezować. Na prašenje, što by było, bychu-li nowiny dwaj dnjej do wólbow zhromadnje namołwjeli: Njewolće CDU a SPD?, Karrenbauer rjekny. „To by jasne šěrjenje měnjenjow do wólbow było.“ Pozadk bě internetna namołwa do wólbow, měrjaca so přećiwo CDU a SPD.
Ze Židami solidarni być
Kretschmer za diferencowany wid na wuchod
Drježdźany/Podstupim (dpa/SN). Sakski ministerski prezident Michael Kretschmer (CDU) žada sej hladajo na wólbne wuspěchi AfD we wuchodnej Němskej diferencowanu reakciju swojeje strony a warnuje zdobom před dalšim pačenjom. „Temy, kotrež su Zelenym w někotrych kónčinach starych zwjazkowych krajow hoberski wuspěch wunjesli, ludźi w nowych zwjazkowych krajach chětro starosća.“ Sakska měła nětko dopokazać, zo zamóže problemy ludźi w Europje rozrisać. Bjeztoho zo by AfD a Zelenych mjenował, so Kretschmer starosći, zo stej z wólbow dwě politiskej mocy wušłoj, kotrejž nimatej ničo ze sobu činić. Přiwšěm stej sej podobnej, dokelž matej „jeno swoje pozicije za absolutne a njejstej kmanej ke kompromisam“. To njeje spomóžne za Němsku. Kraj je stajnje z mocow profitował, kotrež su kmane kompromisy namakać, Kretzschmer potwjerdźa.
Wien z přechodnym knježerstwom
Wien (dpa/SN). Po wotumje njedowěry přećiwo knježerstwu awstriskeho kanclera Sebastiana Kurza chcedźa najpozdźišo w běhu tydźenja přechodne knježerstwo zestajeć. To je zwjazkowy prezident Alexander Van der Bellen wčera wječor připowědźił. Hač do toho ma wicekancler Hartwig Löger najprjedy raz dźěło kanclera dale wjesć. Löger měješe dźensa ministrow formelnje pušćić a samsny wokomik za nachwilny čas znowa powołać, doniž njeje přechodne knježerstwo za něšto dnjow dźěłać započało.
Wčera popołdnju bě awstriski parlament we Wienje na wurjadnym posedźenju wšemu knježerstwu kanclera Sebastiana Kurza njedowěru wuprajiło, dotal jónkrótny to podawk w stawiznach kraja. Opozicija socialdemokratiskeje SPÖ, prawicarskeje FPÖ a lisćiny „Nětko“ bě so přećiwo kanclerej Kurzej a jeho knježerstwu stajiła. Kurzej dawachu sobuwinu na knježerstwowej krizy po wozjewjenju skandalneho wideja wicekanclera FPÖ Stracheho. Kaž Kurz připowědźi, chce k wólbam w septembru zaso nastupić.
Rozjimuja wólbnu poražku
Wodźace gremije CDU/CSU a SPD wo wuslědku europskich wólbow rěčeli
Berlin (dpa/SN). Po historiskej poražce při wólbach Europskeho parlamenta stej hłownej wólbnej přěhračkaj, unija a SPD, za přičinami špatneho wólbneho wuslědka pytać započałoj. Tuchwilu njeje hišće jasne, hač su w tym zwisku tež personelne konsekwency planowane. Wodźacy zastupnicy SPD namołwjeja k jednoće, mjeztym zo sej zastupnicy lěwicarskeho křidła socialdemokratow změnu kursa žadaja. Wčera zetkaštej so nawodnistwje CDU/CSU a SPD, popołdnju tež nawodźa koalicije.
SPD njebě so z 15,8 procentami při wólbach Europskeho parlamenta jenož za Zelenymi na třeće městno sunyła, wona bě při wólbach krajneho sejma w Bremenje historiske fiasko dožiwiła a so po wjace hač 70 lětach CDU podwolić dyrbjała. Zeleni porno tomu běchu dramatisce přidobyli a su nětko druha najsylniša móc w Němskej. Najebać špatny wuslědk stej CDU a CSU ze zhromadnje 28,9 procentami přeco hišće najsylniša móc.
To a tamne (28.05.19)
Jězbu po Jendźelskej přetorhnył je 83lětny Winfried Langner z Delnjeje Sakskeje, znaty jako Deutz-Willi. Poprawom chcyše ze swojim traktorom a bydlenskim připowěšakom do šotiskich horow. Policisća pak su jeho wospjet zadźerželi a dołho přesłyšowali, wumjetujo jemu, zo chce na kupje jenož prosyć. To je wězo šikana Langerej, kiž bě ze swojim jězdźidłom hižo w Norwegskej, na kupje Mallorca a w ruskim Pětrohrodźe.
Woheń w cholowach je šofera wosoboweho awta w Saksko-Anhaltskej překwapił a k nuzowemu borzdźenju nuzował. 36lětny wulěze njedźelu popołdnju z palacymi so cholowami z awta. Sobujěducej so poradźi płomjenja podusyć. Sylnych spalenjow dla dyrbjachu muža do chorownje dowjezć. Policija njewuzamkuje, zo je akku elektrocigarety w zaku muža z Hannovera woheń zawinił.
Z čłowjekami njewikować
Vatikan (B/SN). Wot 8. do 11. apryla wotmě so w gmejnje Sacrofano blisko Roma mjezynarodna konferenca ze 160 wobdźělnikami, kotruž bě Vatikan organizował. Bamž Franciskus je na konferency raznje zasudźił wikowanje z čłowjekami, wosebje z dźěćimi a žonami. „Štóž so z tajkim złóstnistwom womaza, tón jenož druhim škodu njenačinja, ale tež sebi samomu“, rjekny bamž a žadaše sej wuše zhromadne dźěło cyrkwje z politiskimi a towaršnostnymi akterami w boju přećiwo wikowanju z čłowjekami. Biskopja, rjadnicy a sobudźěłaćerjo iniciatiwow za čłowjeske prawa wuradźowachu w mnohich dźěłowych skupinach.
Za nabožinsku swobodu
Vatikan (B/SN). Mjezynarodna komisija teologow Vatikana je studiju k nabožinskej swobodźe předpołožiła. W njej wona wuzběhnje, zo stej na fundamentalizmje tež liberalny stat a etiski relatiwizm sobu wina. Swětonahladna neutralita nabožinskim formam wuraza w zjawnym žiwjenju faktisce zadźěwa. To přisporja namócne a totalitarne ideologije runje tak kaž militantne formy nabožiny.
Spowědne potajnstwo
Konserwatiwni jasny dobyćer
Waršawa (dpa/SN). Pólscy narodnokonserwatiwni su po wuličenju 99 procentow hłosow jasny dobyćer wčerawšich wólbow Europskeho parlamenta. Kaž wólbna komisija zdźěla, nažnja strona Prawo a sprawnosć 45,56 procentow hłosow. Opoziciski zwjazk proeuropskich stron Europska koalicija docpě 38,3 procenty. Wólbne wobdźělenje bě z 45,61 procentami na historiskim rekordnym stawje. Dotal njebě tam nihdy wjace hač 25 procentow ludźi wolić šło.
CDU prěni króć najsylniša móc
Bremen (dpa/SN). Prěni króć w powójnskich stawiznach je CDU w Bremenje z wólbow krajneho sejma jako najsylniša politiska móc wušła. Jeje načolny kandidat, politiski nowačk Carsten Meyer-Heder, přizjewi so wčera wječor za zastojnstwo noweho knježerstwoweho šefa. SPD porno tomu docpě najšpatniši wuslědk minjenych 79 lět. Zeleni a Lěwica móžachu swój wuslědk polěpšić. AfD a FDP budźetej tohorunja w nowym parlamenće zastupjenej.
Planuja wotum njedowěry
