Drježdźany (dpa/SN). Sakska njesměła swój program nastupajo wottorhanje prózdnje stejacych bydlenjow ćěkan­cow dla přetorhnyć. Tole žada sej Rainer Seifert, direktor Zwjazka bydlenskeho a imo­bilijoweho hospodarstwa. „Štóž měni, zo móhł ličbu prózdnje stejacych bydlenjow z ćěkancami pjelnić a tak kóšty wottorhanja lutować, ničo wo dołhodobnym a socialnje zamołwitym wuwiću městow njerozumi“, rjekny Seifert nowinarjam. Wosebje we wjesnych kónčinach, hdźež je dale wjele prózdnych bydlenjow, su naprawy k wottorhanju nu­znje trěbne, wón zwurazni. Zdobom warnowaše před nastaćom tak mjenowa- nych „ghetow“, hdyž so cyłe bydlenske bloki na kromje městow ze špatnej infrastrukturu ćěkancam přewostajeja. Tole tež dołhodobnej integraciji tutych ludźi do towaršnosće njepolěkuje, je sej Seifert wěsty. Hakle spočatk oktobra bě Sakska nowe směrnicy schwaliła, po kotrychž chcedźa wokrjesy a komuny financielnje podpěrać, hdyž ćěkancow w prózdnych bydlenjach zaměstnjeja.

Něhdźe 800 000 eurow je domjaca pomocnica zhromadnje z dalšej žonu w juhozapadnej Francoskej rentnarjej pokradnyła, kiž bě pjenjezy w blachowych tyzach a nohajcach chował. Něhdyši sobudźěłaćer tankownje bě hižo w aprylu policiji zdźělił, zo su jeho cyłe žiwjenje dołho składowane nalutowanki pokradnjene. Na to policistam poměrnje luksuriozne žiwjenske wašnje rjedźerki a jeje přiwuzneje napadny. Dźěl pjenjez móžachu při zajeću žonow sćazać.

Čěskemu šoferej po 20 lětach pokradnjene awto wróća, byrnjež wjace wjele wjesela z nim njezměje. Amaterskaj nurjakaj běštaj jězdźidło, Škodowku 105 ze zadnim motorom, w bagerowym jězoru namakałoj, policija w Olomoucu zdźěli. Wohnjowa wobora 1995 pokradnjene awto z wody wućahny. Ručež su formality zrjadowane, awto mužej přepodadźa.

Choćebuz najmjenje inwestuje

Choćebuz (dpa/SN). Hladajo na wudawki na dobro braniborskeje komunalneje infrastruktury leži město Choćebuz na poslednim městnje. Tole su fachowcy Němskeho instituta za hospodarske slědźenje wuličili. Po tym inwestuje Choćebuz runje 116 eurow na wobydlerja za pěstowarnje, šule a dróhotwar. Cyłoněmski přerězk je wjace hač dwójce tak wulki, mjenujcy 270 eurow wob lěto. Scyła su wuchodoněmske komuny ze swojimi inwesticijemi w špatnym połoženju: Tři štwórćiny wokrjesow nowych zwjazkowych krajow cyłoněmski přerězk njedocpěja, wědomostnicy zwěsćichu. Jedna z hłownych přičin su woteběrace přepokazanki ze solidarneho pakta II. Snadne dawkowe dochody so tak dźeń a negatiwnišo wuskutkuja. Spadowaca ličba wobydlerjow tomule wuwiću polěkuje.

Zarjaduja kubłanske wiki

W dołhich rynkach ćahnu ćěkancy do nuzoweho lěhwa w słowjenskej wsy Rigonce, po tym zo su zelenu mjez Chorwatskej a Słowjenskej­ překročili. Wot toho časa, zo je Madźarska swoju hranicu ke Chorwatskej zawrěła, wužiwaja ćěkancy po tysacach čaru po Słowjenskej, zo bychu Awstrisku a Němsku docpěli. Foto: dpa/Aleš Beno