Mnichow (dpa/SN). Z institutom Ifo je dalši wažny slědźenski institut swoju prognozu za lětuše wuwiće němskeho hospodarstwa chětro pohubjeńšił. Fachowcy Ifo su prognozu hospodarskeho wuwića nimale społojčili a liča lětsa jenož hišće z rozrostom 0,6 procentow, kaž dźensa zdźělichu. Dotal běchu rozrost 1,1 procenta wěšćili. Minjeny tydźeń bě Organizacija za hospodarske zhromadne dźěło a wuwiće wuhlady za němske hospodarstwo wot 1,6 na jenož hišće 0,7 procentow jasnje pomjeńšiła.
Pokazki na podobnosć zražkow
Washington (dpa/SN). Po tym zo su w USA lětadłam typa Boeing 737 Max startować zakazali, je flota toho typa po cyłym swěće w dalokej měrje zlemjena. Zarjad USA za lětarstwo w tym zwisku zdźěla, zo maja nowe dopóznaća k njezbožu Boeing 737 w Etiopiskej, kotrež pokazuja na podobnosće k njezbožu lětadła samsneho typa loni w oktobru w Indoneskej. Tež tam bě pasažěrska mašina jenož mjeńšiny po wotlěće na zemju zrazyła.
Kak dale ze spěchowanjom?
London/Brüssel (dpa/SN). Zapósłancy britiskeho parlamenta chcedźa dźensa wječor wo tym wothłosować, hač njemóhli wustup kraja z Europskeje unije přestorčić. Při tym móža so po woli premierministerki Theresy May mjez krótkej a dlěšej dobu rozsudźić. Wuměnjenje za podlěšenje doby wšak je přihłosowanje wšitkich zbywacych 27 čłonskich statow EU. Poprawom chcyše Wulka Britaniska Europsku uniju 29. měrca, za dobrej dwaj tydźenjej, wopušćić.
Wčera wječor běchu zapósłancy ze snadnej wjetšinu přećiwo tomu hłosowali, zo kraj EU bjez zrěčenja z Brüsselom wopušći. May bě to indirektnje ze swojim z Brüsselom wujednanym zrěčenjom wo wustupje kraja z EU zwjazała.
Wotum delnjeje komory parlamenta bě zdźeržliwe reakcije zbudźił. Zwjazkowy wonkowny minister Heiko Maas (SPD) rěčeše drje wo „rozumnym znamjenju, nětko pak měli Britojo rjec, što poprawom chcedźa“. Justicna ministerka Katarina Barley (SPD) warnowaše, zo rozsud „jenož na wokomik“ změruje.
Drježdźany (dpa/SN). Sakske knježerstwo je swoje razniše postupowanje přećiwo bagatelnym njeskutkam zakitowało a chce dale „nul tolerancy“ pokazować. Knježerstwo je za to zamołwite, prawniski stat zakitować a škit wobydlerjow zaručić, rjekny ministerski prezident Michael Kretschmer (CDU) wčera w krajnym sejmje. Zaměr knježerstwa je, prawo a přepytowanje njeskutkow „bjez rabata“ přesadźić. Nastork debaty bě njedawny wukaz generalneho statneho rěčnika, po kotrymž chcedźa bagatelne delikty přichodnje konsekwentnišo přepytować a pochłostać. W jara kontrowersnej a zdźěla emocionalnej diskusiji so rozdźělne pozicije jara spěšnje pokazachu. Politikar Lěwicy Klaus Bartl ma wukaz za zasah do njewotwisnosće justicy. Postupowanje krajneho knježerstwa maja w kruhu juristow za spodźiwne, wón rjekny. Koaliciji dźe wo to, we wobłuku snadneje kriminality sylnosć demonstrować. „To pak střase zakłady prawniskeho stata.“
Brüssel (SN/at). Němsko-danski pomjezny region wuhotuje přichodnu hłownu zhromadźiznu Europskeje swobodneje aliancy (EFA) klětu w aprylu. Wo tym informowachu na lětušim schadźowanju njedawno w Brüsselu. Klětuši hosćićelski region zastupuje Južnoschleswigski wolerski zwjazk (SSW) w EFA.
Zetkanje budźe we wobłuku swjatočnosćow składnostnje stoteje róčnicy referenduma wo samopostajowanju, organizowaneho za ludnosć w pomjeznej kónčinje Němskeje a Danskeje 1920. We wuslědku tehdyšeho ludoweho wothłosowanja dósta so sewjerna Schleswigska do Danskeje, srjedźna a južna Schleswigska wostaštej w Němskej.
Delegaća su w Brüsselu na dobu třoch lět nowych čłonow běrowa EFA wuzwolili. Prezidentka organizacije je Baskowka Lorena Lopez de Lacalle, generalny sekretar je Katalan Jordi Solé. W Serbach znatej politikarce SSW Anke Spoorendonk dowěrichu zastojnstwo pokładnicy EFA. Mjez dźesać wiceprezidentami stej Słowjance, Marta Bainka z Hibanja za awtonomiju Šleskeje w Pólskej a Nelida Pogačić z Lisćiny za Rijeku w Chorwatskej.
Ručne puta jako žort su w Schwerte pola Dortmunda zasadźenje policije zawinili. 32lětny muž je swojeho 50lětneho znateho w ćahu jako žort do putow zwjazał, kotrež bě w interneće kupił. Hakle po tym pytnyštaj, zo pobrachuje klučik. Jako chcyše železnicar jězdźenki kontrolować, so puta strašnje hromadźe sćahnychu. Zastojnicy přijědźechu z wulkim klučowcom a móžachu pomhać: Jedyn ze starych klučikow so hodźeše.
Mjetanje ze sekeru w korčmach ma w USA dźeń a wjace přiwisnikow. Dokelž maja mnozy dart abo kehelowanje mjeztym za wostudłe, hotuja so korčmarjo přiběrajcy na nowy trendowy sport. Po krótkim zapokazanju móže kóždy na drjewjanu taflu jednu sekeru ćisnyć. Trend běchu lěta 2011 w Kanadźe zrodźili, kotryž so spěšnje tež po Americe rozšěri. Započatkarjo jón pječa jara spěšnje nawuknu.
Brüssel (SN/at). „Europska unija ma domizna wšěm ludźom kontinenta być. Dajće nas Europu zhromadnje tworić; Europu ludźi, narodow a regionow.“ Tak rěka w zakónčacym politiskim wozjewjenju hłowneje zhromadźizny Europskeje swobodneje aliancy (EFA) wot 7. do 9. měrca w Brüsselu. Wšitcy ludźo, a zapřijate su mjeńšinowe zhromadźenstwa kaž tež tajke w diasporje, zasłužeja sej wjace respekta. Hesło zetkanja „Samopostajowanje je prawo, žane złóstnistwo“ zwurazni so zdobom w nominowanju politikarja za njewotwisnosć Katalonskeje Oriola Junquerasa, kiž sedźi w španiskim jastwje, za načolneho kandidata EFA k wólbam Europskeho parlamenta. Wobdźělnicy Łužiskeje aliancy a jako hosćo Serbskeho sejma mějachu nominowansku proceduru „za jara symboliski akt“.
Berlin (dpa/SN). Po nowym wotpokazanju zrěčenja wo wustupje Wulkeje Britaniskeje z Europskeje unije přez delnju komoru britiskeho parlamenta je njerjadowany wustup po słowach wonkowneho ministra Heika Maasa (SPD) dźeń a prawdźepodobniši. Wčerawši rozsud je w jeho wočomaj lochkomyslny a njezamołwity, Maas nowinarjam rjekny. Nětko zbywa hišće 17 dnjow, njerjadowanemu brexitej tola hišće zdźěwać. Němska so, kaž Maas praji, tak derje kaž móžno na tutón „najšpatniši pad“ přihotuje.
Wuhódnoća zapisowak
Frankfurt n. M. (dpa/SN). Awtomatiski zapisowak znjezboženeho pasažěrskeho lětadła Boeing 737 Max 8 chcedźa we wukraju wuhódnoćić. To je rěčnica předewzaća Ethiopian Airlines dźensa připowědźiła. W kotrym kraju chcedźa zapiski analyzować, njeje hišće jasne. Mašina bě njedźelu šěsć mjeńšin po wotlěće na zemju zrazyła. Wšitcy 157 pasažěrojo su žiwjenje přisadźili. Wotběh katastrofy je podobny njezbožu mašiny samsneho typa loni w oktobru w Indoneziskej.
Koch: Mjelčeć přestać