Štyrjo strašnje wupadacy mužojo ze sekeru a flintu w ruce su w durinskej wsy Bucha wulkozasadźenje policije zawinowali. Wot wustróžaneje wobydlerki přiwołana policija přijědźe ze wšitkimi policajskimi awtami, kotrež měješe. Samo policajski helikopter přileća. Móžeše pak žonu spěšnje změrować: Hudźbna skupina nahrawaše tam nowy widejo. Za to běchu póstniske maski wužiwali a so z wohrožacymi gestami pohibowali.
Njemóžny datum je muža jako falšowarja přeradźił. Při policajskej kontroli w Dortmundźe bě wón zastojnikam pólsku jězbnu dowolnosć prezentował, kotraž bě na 32. awgust 2017 wupisana. Dokelž tónle datum po wědźenju zastojnikow tež w Pólskeje njeeksistuje, rešeršowachu dale. Wuslědk: Jězbna dowolnosć bě falšowana a awto hižo měsacy wotzjewjene. Zastojnicy woboje sćazachu.
Raül Romeva bě wonkowny minister katalanskeho regionalneho knježerstwa w Barcelonje a mjeztym něhdźe lěto w jastwje sedźi. Njedawno bu 47lětny runja jědnaće dalšim Katalanam do Madrida přepołoženy, hdźež su 12. februara proces přećiwo nim zahajili. Politikarjam a zastupnikam katalanskich towarstwow, kotřiž běchu njedowoleny referendum 1. oktobra 2017 organizowali, wumjetuja rebeliju a překřiwjenje zjawnych pjenjez. Za Romevu žadaja sej wobskóržbnicy 16 lět jastwa.
Bywšemu šefredaktorej słowjenskeho dźenika w Italskej Primorski Dnevnik, kotryž je runja Serbskim Nowinam čłon Europskeho zjednoćenstwa dźenikow w mjeńšinowych a regionalnych rěčach (MIDAS), Bojanej Brezigarej je so poradźiło Raülej Romevje někotre prašenja napisać, na kotrež je Katalan z jastwa wotmołwił. Jako čłon MIDAS ma tež naš wječornik składnosć, na zakładźe mjezsobneho dorěčenja čłonow MIDAS interview wozjewić.
Swobodny stat Sakska přewostaja lětsa prěni raz 300 000 eurow za serbski komunalny program, to je za kóždu z 42 gmejnow w serbskim sydlenskim rumje 5 000 eurow. Na informaciskim zarjadowanju Rady za serbske naležnosće móžachu so komunalni zastupjerjo wčera hłubšo do maćizny zanurić.
Washington (dpa/SN). Knježerstwo USA nochce přichodnje ličbu ciwilnych smjertnych woporow při nalětach na teroristow z njewobsadźenymi lětadłami mjenować. Prezident Donald Trump je wčera wotpowědny wukaz swojeho demokratiskeho předchadnika Baracka Obamy zběhnył. Po nim dyrbješe knježerstwo hač do 1. meje ličby předpołožić. Hižo loni bě to knježerstwo Trumpa ignorowało. Fachowcy z toho wuchadźeja, zo kóžde lěto hač do 3 000 ciwilistow w Syriskej, Afghanistanje, Jemenje a Pakistanje nalětow dla žiwjenje přisadźi.
Merz chcył zastojnstwo w CDU
Berlin (dpa/SN). W boju wo předsydstwo CDU podležany Friedrich Merz ma so z městopředsydu jeje hospodarskeje rady stać. To je přichodna předsydka gremija Astrid Hamker zdźěliła. Merz je po jeje słowach swoju zwólniwosć signalizował, za zastojnstwo kandidować. W tej funkciji ma wón tež na wólbnobojowych zarjadowanjach w Sakskej, Durinskej a Braniborskej wustupować. Hamker na to pokaza, zo ma Merz w CDU wjele přiwisnikow.
Wuradźuja wo azylu w EU
Passau (dpa/SN). Předsyda CSU Markus Söder je liberalnych čłonow AfD namołwjał ze strony wustupić. „Nawróćće so a wostajće nacijow samych w AfD. Je načasu směr změnić“, rjekny bayerski ministerski prezident na wčerawšej politiskej popjelnej srjedźe w Passauwje. AfD njeje strona wosamoćenych konserwatiwnych, wosebje křidło wokoło durinskeho prawicarja Björna Höckeho je cyle jasnje po puću do prawicarskeho ekstremizma. „Štóž nochcył tomu dlěje sćěhować, dyrbjał stronu wopušćić.“
Dyrbjała-li Němska, tak kaž sej to AfD w europskim wólbnym boju žada, Europsku uniju wopušćić, by to kónc derjeměća a „kónc europskeje ideje było, kaž ju znajemy“, Markus Söder praji.
Berlin (dpa/SN). W zwisku z masowym zapućowanjom ćěkancow do Němskeje běchu zamołwići tysacy pokiwow na móžnych wójnskich złóstnikow mjez požadarjemi azyla ignorowali. To wuchadźa po informacijach nowiny Bild z wotmołwy zwjazkoweho nutřkowneho ministerstwa na naprašowanje frakcije FDP w zwjazkowym sejmje.
Po tym je zwjazkowy zarjad za migraciju a ćěkancow wot lěta 2014 hač do spočatka 2019 něhdźe 5 000 pokiwow na „złóstnistwa po ludoprawje“ zwjazkowemu kriminalnemu zarjadej a generalnemu statnemu rěčnistwu podał. Z druhich stron přińdźe 2 000 pokiwow. Jenož w 129 padach pak su přepytować započeli. W lěće 2015/2016, potajkim na wjeršku přichada migrantow, mějachu po rozprawje 3 800 tajkich pokiwow. Wobdźěłali pak su jenož 28 padow. „Wulka ličba pokiwow njeje zmóžniła, wšitke pady z policajskimi srědkami přepytować“, zdźěli rěčnik zwjazkoweho nutřkowneho ministerstwa. FDP knježerstwu wumjetuje, zo njeje so chutnje dosć wo problem starało.
Moskwa (dpa/SN). Najebać zapadne sankcije a wosłabjace hospodarstwo su němske firmy loni zaso wjace w Ruskej inwestowali, kaž Němsko-ruska wonkowikowanska komora (AHK) wčera w Moskwje zdźěli. Po ličbach Zwjazkoweje banki su direktne inwesticije lěta 2018 na dwě miliardźe eurow rozrostli. „To je sobu najwjetša ličba po rozpadźe Sowjetskeho zwjazka“, rjekny nawoda AHK Matthias Schepp. Hišće wjetšu ličbu běchu naposledk 2008 docpěli.
Lěta 2014 běchu EU, USA a dalše kraje w zwisku z krizu na Ukrainje sankcije přećiwo Ruskej wukazali. Nimo tajkich chłostanskich naprawow haća po měnjenju předewzaćow tež pobrachowace reformy a wulka wotwisnosć wot energijowych eksportow ruske hospodarstwo. To so negatiwnje na kurs rubla wuskutkuje. Nimo za wukrajnych inwestorow přijomneho kursa rubla je w Ruskej po słowach Scheppa tójšto na zapadźe wukubłanych fachowcow, štož je za němske firmy, kotrež w Ruskej skutkuja, jara atraktiwne. W někotrych wobłukach je so Ruskej poradźiło, klimu za wukrajne inwesticije widźomnje polěpšić.