Berlin (dpa/SN). W zwisku z masowym zapućowanjom ćěkancow do Němskeje běchu zamołwići tysacy pokiwow na móžnych wójnskich złóstnikow mjez požadarjemi azyla ignorowali. To wuchadźa po informacijach nowiny Bild z wotmołwy zwjazkoweho nutřkowneho mi­nis­terstwa na naprašowanje frakcije FDP w zwjazkowym sejmje.

Po tym je zwjazkowy zarjad za migraciju a ćěkancow wot lěta 2014 hač do spočatka 2019 něhdźe 5 000 pokiwow na „złóstnistwa po ludoprawje“ zwjazkowemu kriminalnemu zarjadej a generalnemu statnemu rěčnistwu podał. Z druhich stron přińdźe 2 000 pokiwow. Jenož w 129 padach pak su přepytować započeli. W lěće 2015/2016, potajkim na wjeršku přichada migrantow, mějachu po rozprawje 3 800 tajkich pokiwow. Wobdźěłali pak su jenož 28 padow. „Wulka ličba po­kiwow njeje zmóžniła, wšitke pady z po­licajskimi srědkami přepytować“, zdźěli rěčnik zwjazkoweho nutřkowneho minis­terstwa. FDP knježerstwu wumjetuje, zo njeje so chutnje dosć wo problem starało.

Ze Serbskeho komunalneho programa měli města a gmejny w serbskim sydlenskim rumje mocy čerpać, zo móže wjace abo scyła něšto za wjetšu prezencu serbšćiny w zjawnosći činić. Wězo su nowosće zwjetša z prašenjemi zwjazane. Tohodla bě wužitne, zo je Rada za serbske naležnosće zastupjerjow komunow na informacisku hodźinu wčera do Serbskeho domu přeprosyła. Nimo toho zeznachu přitomni z dr. Jensom Baumannom muža, kiž je jako zamołwity jich direktny partner w sakskim nutřkownym ministerstwje. Anonymnosć ministerstwa bu zběhnjena a tak přeswědčenje skrućene, zo dźěłatej wobě stronje za samsny zaměr. To je wažne. Wězo wobsahuja komunam připósłane podłožki pokiwy, za čo móhli lětsa a klětu po 5 000 eurach wužiwać. To su namjety, ale tworićelske ideje njejsu poprawom wobmjezowane. Njewěstota njeměła komuny wotdźeržować, prosyć wo „serbske“ srědki w zajimje našeje maćeršćiny. Lěpje je so prašeć. Axel Arlt

Moskwa (dpa/SN). Najebać zapadne sankcije a wosłabjace hospodarstwo su němske firmy loni zaso wjace w Ruskej inwestowali, kaž Němsko-ruska won­kowikowanska komora (AHK) wčera w Moskwje zdźěli. Po ličbach Zwjazkoweje banki su direktne inwesticije lěta 2018 na dwě miliardźe eurow rozrostli. „To je sobu najwjetša ličba po rozpadźe So­wjetskeho zwjazka“, rjekny nawoda AHK Matthias Schepp. Hišće wjetšu ličbu běchu naposledk 2008 docpěli.

Lěta 2014 běchu EU, USA a dalše kraje w zwisku z krizu na Ukrainje sankcije přećiwo Ruskej wukazali. Nimo tajkich chłostanskich naprawow haća po měnjenju předewzaćow tež pobrachowace reformy a wulka wotwisnosć wot energijowych eksportow ruske hospodarstwo. To so negatiwnje na kurs rubla wuskutkuje. Nimo za wukrajnych inwestorow přijomneho kursa rubla je w Ruskej po słowach Scheppa tójšto na zapadźe wukubłanych fachowcow, štož je za němske firmy, kotrež w Ruskej skutkuja, jara atraktiwne. W někotrych wobłukach je so Ruskej poradźiło, klimu za wukrajne inwesticije widźomnje polěpšić.

Składnostnje wopyta zwjazkoweho ministra za strowotnistwo Jensa Spahna (CDU, nalěwo) je so wčera něhdźe sto lěkarjow, chorobnych sotrow a dalšich sobudźěła­ćerjow Budyskeje chorownje před wjacezaměrowej halu na Třělnišću zhromadźiło, w kotrejž wotmě so politiska popjelna srjeda sakskeje CDU. Z plakatami a hwěžkami protestowachu woni přećiwo přiběracej běrokratiji w strowotnistwje. Na plakatach sej žadachu: „Wjace chwile za pacientow“ abo „Nic za pisanskim blidom, ale při łožu choreho“. Minister Spahn je demonstrantam, kotřiž dyrbjachu dlěje hač hodźinu w šćipatym wětřiku čakać, pomoc přilubił. Foto: SN/Maćij Bulank