UNICEF trjeba miliardy eurow za potrěbne dźěći
Genf (dpa/SN). Po wšěm swěće su miliony dźěći wot wójny, konfliktow, namocy a přirodnych katastrofow potrjechene. Dźěćacy pomocny skutk Zjednoćenych narodow UNICEF chce lětsa 41 milionow dźěći škitać, lěkarsce a ze žiwidłami zastarać. Nimo toho chcedźa jim zmóžnić, tež w krizowych časach do šule chodźić. Za to trjebaja 3,4 miliardy eurow, kaž UNICEF wčera w Genfje zdźěli.
Nimale třećinu pjenjez chce UNICEF za syriske dźěći w kraju a wukraju nałožić. Wulku potrjebu widźa tež w arabskim wójnskim kraju Jemenje a we wot konfliktow střasenym Kongu. „Dźensa ćerpja miliony dźěći pod surowej namocu a nuzu“, pisa eksekutiwna direktorka UNICEF Henrietta Fore. „Dźěći su často trawmatizowane. Hdyž nimaja žane zawěsćene městna za hrajkanje, hdyž njejsu mjez swojimi swójbnymi a nimaja žanu psychologisku podpěru, jich njewidźomne rany ženje njezažija.“
Rozrisanje namakać
Połdra hodźiny kołowokoło Łužicy po puću byli
Budyšin (CS/SN). Tež lětsa wuhotuje Budyske staroměšćanske towarstwo zaso rjad přednoškow wo stawizniskich zajimawostkach Łužicy. Prěnje zarjadowanje přiwabi wčera telko zajimcow, zo bě sydarnja měšćanskeje biblioteki połnje wobsadźena.
Chemikarka a hobbyjowa historikarka dr. Gabriele Lang poda so z připosłucharjemi na něhdźe 700 kilometrow wopřijacu a samo teritorij za Nysu wobkedźbowacu jězbu podłu hranicy Łužicy. Najwuchodniša mjeza je rěčka Kwisa (Queis). W bohaće ilustrowanym referaće rozłoži dr. Lang tójšto wosebitosćow krajiny wot Połčnicy hač ke Kwisy na zapadźe a wuchodźe kaž tež wot Čorneho Halštrowa na sewjeru hač k čěskej mjezy na juhu.
To a tamne (30.01.19)
„Mobilny włóžny biotop“ su policisća w Dortmundźe zadźerželi. Při wobchadnej kontroli bě zastojnikam awto napadnyło, kotrež měješe wjele mocha na kromje woknow, při durjach a dalšich dźělach karoserije. Tež prědnja škleńca bě torhnjena. Po tym zo bě sej wěcywustojny „mochowy mobil“ bliže wobhladał a tójšto techniskich njedostatkow zwěsćił, policisća awto nablaku sćazachu.
Mjena psow su mjenam dźěći dźeń a podobniše. To je register domjaceho skotu Tasso zwěsćił, pytajo za najwoblubowanišim psyčim mjenom 2018. Najwoblubowaniše běchu loni mjena kaž Lilly, Luna a Lucy. Tež Bruna a Maxa na lisćinje dźesać wodźacych mjenow namakaš. Pozadk toho drje je tón, zo maja ludźo domjace zwěrjata mjeztym za runohódnych čłonow swójby a zo mjena tomu wotpowědnje wuzwoleja.
Sejm zasadnje njewotpokazany
Kukow (SN/JaW). Wjetšina Serbow Serbski sejm w formje, kaž bu wutworjeny, jako swoje zastupnistwo njeakceptuje. To je wuslědk akcije skupiny Kukowske prašaki.
Kaž z kónčneho wozjewjenja cyłka, kotrež redakciji předleži, wuchadźa, je so dohromady 1 314 ludźi na akciji wobdźěliło. Z nich je na prašenje „Chcu ja TUTÓN Serbski sejm?“ 1 248 – něhdźe 95 procentow – z ně wotmołwiło. Jeničce 66 ludźi so za sejm wupraji. Zběrała je dwanaćečłonska iniciatiwa podpisma přewažnje na „serbskorěčnych horjanskich a delanskich wsach, wokoło Kulowa, Radworja a Slepoho kaž tež w Budyšinje. W Delnjej Łužicy nazběrachu 102 hłosaj. Z nich bě jenički za „haj“, kaž skupina wčera zdźěli. Zběrali su podpisma wot srjedź oktobra hač do kónca minjeneho lěta.
Pojědu po Łužicy
Běła Woda (AK/SN). Armeja USA přepołoži kónc januara, spočatk februara wulke jednotki z belgiskeho Antwerpena do Pólskeje a budźe tež we Łužicy po puću. „To njeje swójska akcija Američanow, ale wuslědk wobzamknjenja wjerškowych zetkanjow NATO w lětach 2014, 2016 a 2018“, podšmórny Timothy Eydelnant, generalny konsul USA za Saksku, Saksko-Anhaltsku a Durinsku, wčera w Běłej Wodźe w přitomnosći wyšeho měšćanosty Torstena Pötzscha (Klartext).
Jednotki pojědu we wobłuku operacije „Atlantic Resolve“ wot Forta Rileyja w Kansasu, USA, do Pólskeje. „Zaměr lěta 2014 zahajeneje operacije, je zawěsćić zasadźensku hotowosć wójskow NATO we wuchodnej Europje. W Europje matej so měr a stabilita trajnje zawěsćić“, generalny konsul podšmórny. Kraje Baltikuma a Pólska čuja so wot Ruskeje wohrožene.
Kritizuja koncepty za wuchod
Berlin (dpa/SN). Iniciatiwa CDU a SPD na dobro wuchodoněmskich zwjazkowych krajow zbudźa kritiku mjez hospodarskimi wědomostnikami. „Wot CDU a SPD namjetowane naprawy njejsu kmane, wuchodnu Němsku zapadej hospodarsce zbližić“, rjekny wotrjadnik Instituta za hospodarske slědźenje w Halle Oliver Holtemüller nowinarjam. Namjety dweju stronow spytaja symptomy lěkować, bjeztoho zo so korjenjam problemow wěnuja. We wočomaj Holtemüllera je iniciatiwa CDU a SPD „ryzy wólbny bój“.
Korupcija w Němskej přiběra
Berlin (dpa/SN). W hospodarstwje a institucijach Němskeje korupcija a wobtykanje přiběratej. Wodźace wosobiny mjezynarodneho hospodarstwa zastopnjuja Němsku w tak mjenowanym korupciskim indeksu organizacije Transparency International špatnišo hač do toho. We wobłuku naprašowanja organizacija rozměr korupcije přepytuje. Němska steji najebać pohubjeńšenje přeco hišće na 11. městnje mjez cyłkownje 180. Najlěpje je w Danskej, najšpatnišo, kaž hižo loni, w Somaliji.
Huawei wobskorženy
Tójšto zajimcow přiwabja tele dny ruska wójnska 3D-panoramowa ...
Šiman za spěšne financne jednanja
Berlin (SN/MkWj). Parlamentariska přirada Załožby za serbski lud ma noweho městopředsydu. Čłonojo gremija, zapósłancy krajneju sejmow Sakskeje a Braniborskeje a Němskeho zwjazkoweho sejma, su na swojim posedźenju minjeny pjatk w Berlinje Klausa-Petera Schulzu do zastojnstwa wuzwolili. Schulze je zapósłanc CDU w zwjazkowym sejmje a bě wjele lět Grodkowski měšćanosta.
Předsyda parlamentariskeje přirady, zapósłanc CDU w Sakskim krajnym sejmje Marko Šiman, je z nowej personaliju jara spokojom. „Jako bywši měšćanosta je Klaus-Peter Schulze z wobstejnosćemi regiona wusko zwjazany a so tež jara za serbske naležnosće zasadźa“, rjekny Šiman našemu wječornikej.
Na dnjowym porjedźe stejachu mjez druhim nowe jednanja mjez Sakskej, Braniborskej a zastupnikami Zwjazka wo financowanju załožby, kotrež su so wčera w Podstupimje zahajili. Přirada je w tym zwisku namołwjała, přidatne srědki něhdźe 600 000 eurow za digitalizaciju nałožić, zo bychu nowe techniske móžnosće za wužiwanje serbskeje rěče w modernych medijach nastali.
Křidło CDU: Symbolowa politika
Berlin (dpa/SN). Hospodarske křidło frakcije CDU/CSU w zwjazkowym sejmje před tym warnuje, ludźom w zwisku z planowanym kóncom zmilinjenja brunicy wulke pjenježne poćežowanja nabrěmjenić. „Wobsteji podhlad, zo jedna so tule wo hospodarskopolitisce drohu klimapolitisku symbolowu politiku“, rjekny hospodarskopolitiski rěčnik Joachim Pfeiffer (CDU) powěsćerni dpa.
Wot knježerstwa zasadźena wuhlowa komisija bě minjeny kónc tydźenja koncept skónčenja zmilinjenja brunicy najpozdźišo hač do lěta 2038 předpołožiła. Němska klimu „ze stajnje nowymi samowólnymi naprawami“ njewuchowa. To je jenož na europskej a globalnej runinje móžno, awtorojo pisaja.
„Hižo nětko dyrbja domjacnosće a zawody w Němskej najwyše płaćizny miliny po wšej Europje znjesć. Najebać to maja ludźo z dale přiběracymi płaćiznami ličić, dyrbjeli-li so poručenja komisije zwoprawdźić“, rěka w zdźělence.
