Berlin (dpa/SN). Zwjazkowa wobora chcyła fachowcow z druhich krajow Europskeje unije nawabić. Tole je generalny inspektor zwjazkoweje wobory, Eberhard Zorn, nowinarjam wobkrućił. Při tym měrja so na fachowcow kaž lěkarjow abo kompjuterowych specialistow. W časach pobrachowacych fachowcow měło so „do wšitkich směrow“ zhladować. Zwjazkowe knježerstwo je so pječa hižo na druhe kraje EU w tymle prašenju wobroćiło. Dotal pak je wothłós skromny.
Rekord pola dźěćacych pjenjez
Berlin (dpa/SN). Ličba ludźi, kotřiž dóstawaja dźěćacy pjenjez, docpěje drje lětsa z wjace hač 15 milionami nowy rekord. Hač do kónc nowembra su 15,35 milionow dźěći zličili, kotrež dóstawaja pjenjezy wot němskeho stata. Tole wuchadźa ze statistiki swójbneje kasy, powěsćernja dpa rozprawja. Kónc 2017 bě to 14,97 milionow dźěći było. Ličba wukrajnych dźěći, kotrymž pomoc wupłaća, je so na nimale tři miliony zwyšiła. Nimale 282 000 dźěćom w druhich krajach EU kaž tež w Turkowskej a bywšej Juhosłowjanskej tohorunja pjenjezy přepokazaja.
Schulz: Čłonojo měli wolić
Ramstein (dpa/SN). Na wróćopuću swojeho překwapjaceho wopyta w Iraku je prezident USA Donald Trump w porynsko-pfalcskim Ramsteinje přizemił. Mašina prezidenta Air Force One doleća dźensa rano na tamniše zepěranišćo wójska, kaž Běły dom we Washingtonje zdźěla. Po prěnjej rozmołwje z oficěrami w lětadle je so Trump zhromadnje ze swojej mandźelskej Melaniju do lětadłoweje hale podał, hdźež wojacy hižo na njeho čakachu. „Halo ludźo“, jich Trump postrowi. Wone mějachu na to składnosć, so z prezidentom fotografować dać.
Trump bě do toho ameriskich wojakow w Iraku wopytał. Bě to prěni wopyt Trumpa pola wojakow USA we wukrajnej krizowej kónčinje scyła. Tam bě Trump swój rozsud zakitował, ameriskich wojakow ze Syriskeje cofnyć. „Njemóžemy dlěje swětowy policist być. Njeje fairne, hdyž dyrbja Američenjo tutu zamołwitosć sami njesć“, wón rjekny.
Drježdźany (dpa/SN). Sakski financny minister Matthias Haß (CDU) boji so wjetšeje wotwisnosće wuchodoněmskich zwjazkowych krajow wot Zwjazka noweho zrěčenja wo financnym wurunanju dla. „Dźěći su přichodnje sylnišo wot nana wotwisne. To widźu z wulkimi starosćemi“, rjekny Haß w Drježdźanach. Z nowymi financnymi poćahami mjez Zwjazkom a krajemi je sej Zwjazk prawo soburěčenja a kontrolu nad financami krajow de facto kupił. Přiběrace wotwisnosće krajow su Haßej wuraz centralistiskeho wuwića. „To je krajam kaž Sakskej, kotrež maja sylny narok na samopostajowanje, wulke mjerzanje.“ Jako přikład mjenowaše Haß zwadu wo digitalny pakt.
Hladajo na konjunkturne wuwiće Haß rjekny, zo ma „złotu dekadu“ z bohatymi dawkowymi dochodami za skónčenu. Prěnje signale su po jeho słowach hižo widźomne, byrnjež hišće žane pokazki na krizu njebyli. „Rozrost wosłabnje. Tole je so hižo při najnowšim trochowanju dawkowych dochodow jasnje pokazało.“
Budyšin (SN/BŠe). Železniske mosty sakskeje wobchadneje syće su w hubjenym twarskim stawje. Cyłkownje 132 mostow – sydom procentow – ma so saněrować. To wuchadźa z naprašowanja zapósłanca zwjazkoweho sejma Torstena Herbsta (FDP), kiž skutkuje w zwjazkowym wuběrku za wobchad a digitalnu infrastrukturu. „Tuchwilu staw zatraša. Tu wjeća so dołholětne zastatki w zdźerženju a modernizaciji železniskeje syće. Bohužel je zwjazkowe knježerstwo minjene tydźenje znowa zapasło, konkretne naprawy k pospěšenju planowanjow we wosebitym zakonju zakótwić. Nimo pjenjez su mjenujcy planowanja a dowolenske jednanja přičina deficitow“, Torsten Herbst zwěsća.
Jako prěni čłowjek scyła je Američan Antarktis bjez kóždeje pomocy přeprěčił. Wčera rano je 33lětny Colin O’Brady po swójskich informacijach swój cil Ross- Schelfeis docpěł. Na sněhakach bě wón w běhu 54 dnjow něhdźe 1 500 kilometrow w ekstremnej zymje zmištrował. Swoje wosobinske wěcy ćahaše wón na sankach za sobu. O’Brady bě swoje pućowanje internetnje dokumentował.
Bosy a w nócnym wobleku je dwulětny hólc druhi swjaty dźeń hód w Hornjej Frankskej po dróze běhał. Do toho bě so wón skradźu ze spanskeje stwy staršeju zminył. Wobydlerjej městačka Wildenheid pjerach napadny. Wón zawi jeho do přikrywa a dowjeze jeho na policajsku stražu, hdźež jeho z čajom zastarachu. Jako chcyše mać dźěćo wotewzać, hólc na tym wobsteješe, trikowy film dohladać, kiž běchu jemu zastojnicy zaswěćili.
Berlin (SN/at). Federalistiska unija europskich narodnych mjeńšin (FUEN) wobsteji klětu 70 lět. W nowembrje 1949 we Versaillesu załožena organizacija wuhotuje składnostnje swojeho jubileja kongres. Tón steješe sobu w srjedźišću rozmołwy, na kotruž bě społnomócnjeny zwjazkoweho knježerstwa za wusydlencow a narodne mjeńšiny dr. Bernd Fabritius prezidenta FUEN Loránta Vinczeho a wiceprezidenta Bjarnata Cyža spočatk tydźenja do Berlina přeprosył. Fabritius chcyše so wo aktualnym połoženju europskich mjeńšin a wo klětušich planach FUEN wobhonić, kaž FUEN zdźěla.
Rozmołwni partnerojo běchu sej nastupajo prócowanja FUEN přezjedni, zasadźeć so za prawa narodnych mjeńšin a spěchować jich měrliwe zhromadne žiwjenje we wjetšinowych towaršnosćach, zachować narodnu suwerenitu čłonskich statow kaž tež striktnje wotpokazać separatizm a nacionalizm. Dr. Fabritius je podpěru Zwjazka za projekty FUEN připrajił. Wón a Loránt Vincze měnitaj, zo měli we wobłuku „Němsko-Danskeho lěta kulturneho přećelstwa“ 2020 w Flensburgu „Dom mjeńšin“ wotewrěć.