Módro-běli Njeswačidło
– Budissa Budyšin 0:24 (0:11)
Za hosća zasadźeni: Große – Heppner, Klippel, Pfanne, Patka, Kral, Hoßmang, Čermák, Walther, Kunert, Rupf, Rosendo, Reher, Salewski.
Zo njeby Budissa Budyšin na swobodnym hrajnym dnju z rytmusa přišła, wupytachu sej chowancy trenarja Tomaša Henčla z testowej hru pola wokrjesnehokoparskeho ligista Módro-běli Njeswačidło lochku treningowu jednotku. Za domjacych běše to najebać test zawěsće jedyn z wjerškow cyłeje karjery, wšako so kóždemu towarstwu njeporadźi, tajkeho přećiwnika we wobłuku sportoweho swjedźenja přeprosyć.
Zo wuslědk wysoki wupadnje, bě wot wšeho spočatka jasne. Při horcych temperaturach pak běše partija tež koparjam Budissy woprawdźite wužadanje, wšako dyrbjachu wězo kóždu kombinaciju hač do kónca prawje wuhrać. W druhim połčasu měješe hosćićel samo mału šansu na wrota, kotrež pak so tola njeporadźichu. Dohromady zasadźi trenar Henčl 15 hrajerjow, jeničce wrotar Jakubov sedźeše cyły čas na ławce.