Finale beachvolleyballtury w Miłoćicach wuhrali
Cyłkownje 16 mustwow bě so za wčerawši beachvolleyballowy turněr Radija Satkula přizjewiło. Přijěło pak je najprjedy raz jenož 15 mustwow. Granit Hórki dyrbjachu krótkodobnje z personalnych přičin wotprajić. Zastupjerjo z Wotrowa pak, po tym zo su wčera hišće připrajili, runjetak do starta wotprajichu kaž tež dalše narunanske mustwo z Chrósćic. Dźakowano Worklečanskemu sportowcej Marcelej Rjelce pak je so turněr skónčnje tola dypkownje w šesćich zahajić móhł – ze 16 mustwami. Rjelka bě mjenujcy hišće w běhu hodźiny pjeć volleyballistow aktiwizował a tak 16. mustwo nastajił.