Čłonojo Serbskeho Sokoło, třěšneho zwjazka serbskich sportowčow a sportowcow, schadźowachu so zašły tydźeń w Budyšinje, zo bychu lěto 2019 wuhódnoćili a so na nowe přihotowali. Z rěčnikom Serbskeho Sokoła Janom Hrjehorjom je so Jurij Bjeńš rozmołwjał.
Serbski rozhłós je sobotu w swojim powěsćowym přehledźe wo tym rozprawjał, zo přewjedźe Serbski Sokoł 38. sokołski wolejbulowy turněr hakle w meji 2020 a nic po zwučenym wašnju w měrcu.
J. Hrjehor: Smy sej raz dźěło činili a wšitke hrajny klasy na wokrjesnej a wobwodnej runinje, w kotrychž hraja serbske wolejbulistki a serbscy wolejbulisća, přehladali a zwěsćili, zo nimamy hač do apryla 2020 ani jednu sobotu, na kotrejž njeje winowatostneho hrajneho dnja bjez serbskeho wobdźělenja. Smy so tuž na to dojednali, zo wočaknjemy kónc sezony 2019/2020. Prěni móžny termin, na kotrymž by poprawom nimale kóždy chwile měć dyrbjał, by 2. meja 2020 była. To pak dyrbimy z tym ličić, zo wužija někotři podlěšeny kónc tydźenja za dowol, tuž smy so za 9. meju rozsudźili.
Znowa budźe turněr w Radworju, nic w Budyšinje ...