Serbowka U 21-cup w Lipsku dobyła
Kulowčanka Magdalena Šeferec je lětuši Eggersmannowy juniorski cup dobyła. Tón wotměwaja kóždolětnje k zahajenju konjacych wikow Partner Pferd w Lipsku.
Lipsk (SN). „To je woprawdźe něšto wurjadneho“, přeradźi 19lětna studentka zawodneho hospodarstwa a čłonka Kulowskeho jěchanskeho towarstwa po wuspěchu minjeny štwórtk w měsće nad Plesnu. „Sym so jara prócowała spěšniša być hač kontrahenća, a by tež hišće trochu spěšnišo šło. Přiwšěm je dosahało.“ W kónčnym přechodźe přesadźi so wona na dźesaćlětnej koble Kandela R, kotraž je mjeztym sydom lět we wobsydstwje Šeferec swójby.
Po lońšim wobdźělenju bě so Magdalena Šeferec lětsa druhi króć za finale Eggersmannoweho juniorskeho cupa w Lipsku skwalifikowała a je wobdźělenje z triumfom skrónowała. Z časom 33,46 sekundow zmištrowa wona naročny finalny parcours, wobstejacy ze šěsć zadźěwkow – jedyn z nich bě dwójny skok – w klasy M*, bjez zmylka w Lipšćanskich wikowych halach a wostaji Lenu Dreilich z Möckerna na konju L’amie de Coeur a Lilli Plath z Wismara na Zidane D. na 2. a 3. městnje zady so.