17. bulowa nóc Natwara Němske Pazlicy w Kamjencu
Do tak mjenowaneje 17. buloweje nocy Sportoweho towarstwa Natwar Němske Pazlicy běchu koparjo Zeleno-běłych Hórki z poražku 0:1 přećiwo ST Marijinej hwězdźe startowali. Přećiwo klewernje wustupowacemu klóšterskemu cyłkej nochcychu so chowancam trenarja Mikławša Dyrlicha žane wrota poradźić. Druha hra dnja skónči so za zeleno-běłych ze samsnym wuslědkom, tónraz pak z wulkim wjeselom, wšako bě Hórčan Daniel Matješk třělc rozsudnych wrotow. Jasnišo přewinychu serbscy koparjo na to Přećelski kruh Natwara Němske Pazlicy. Roman Mejgl bě dwójce trjechił, Matješk znowa jónu. Mustwo Natwara Němske Pazlicy, kotrež bě Hórki loni w finalu z 3:1 přewinyło, móžeše w štwórtej skupinskej hrě hosćom jenož dypk wotewzać. Třělc ke kónčnemu 1:1 běše Handrij Jurk. Rodźeny Hrańčan bě z wulkim zasadźenjom kulowatu kožu přez wrotowu liniju stłóčił. Zo bychu hišće realistiske móžnosće na zaćah do połfinala měli, dyrbjachu oldije ze skałarskeje wsy swoju pjatu a poslednju partiju w předkole z třomi dalšimi dypkami zakónčić.