Pólske knježerstwo chcyło dopokazy za ruski atentat na swoje lětadło
Waršawa. Plany pólskeho knježerstwa, wšitke w rowach pochowane wopory lětadłoweje katastrofy pola Smolenska ekshuměrować a znowa přepytować dać, zbudźa mjez přiwuznymi a w medijach kraja razne reakcije. Knježerstwo chcyło po tutym puću dopokazać, zo njebě katastrofa njezbožo, ale ruski bombowy atentat. Dnja 10. apryla 2010 bě mašina z te- hdyšim prezidentom Lechom Kaczyńskim a 95 dalšimi wosobinami pólskeho towaršnostneho žiwjenja při pospyće, w ruskim Smolensku přizemić, znjezbožiła. Nichtó njeje tehdy přežiwił. Bjezposrědnje po wólbnym dobyću 2015 je nawoda narodnokonserwatiwneje strony Prawo a sprawnosć Jarosław Kaczyński, bratr znjezboženeho prezidenta, nowe přepytowanja připowědźił.