Pólske knježerstwo prěnje lěto swojeho dźěła bilancowało

Waršawa. Nowe pólske knježerstwo z narodnokonserwatiwnej stronu Prawo a sprawnosć (PiS) na čole je tele dny runje lěto w zastojnstwje. Ministerska prezidentka Beata Szydło je z teje přičiny minjenu wutoru we Waršawje wulku konferencu zarjadowała, zo by dźěło knježerstwa bilancowała. Te běše z jeje wida – kak móhło hinak być – přewšo wuspěšne.

Szydło bě do žurle swojeje kenclije reprezentatiwnu měšeńcu pólskeje towaršnosće přeprosyła: dźěłaćerjow a ratarjow runje tak kaž zastupnikow inteligency, žurnalistow a młode swójby z dźěćimi. Za najmjeńšich běchu samo kut k hrajkanju spřihotowali. Přitomni ministrojo přeprošenemu „ludej“ nawšě pjeć hodźin wuspěchi swojeho dotalneho skutkowanja nazornje předstajachu.

Beata Szydło móžeše cyły rjad polěpšenjow na socialnym polu naličić, tak zwyšeny maćerski pjenjez za dźěći, zniženje rentoweje staroby na 60 lět za žony a 65 lět za muži. Runje tak pozitiwnje hódnoćeše wona darmotne lěki za rentnarjow nad 70 lětami abo zwyšenje zakładneje minimalneje mzdy.