Praha (SN/MKWj). Zo su zjawne słyšenje k naležnosćam Serbow minjenu wutoru w Senaće čěskeho parlamenta w Praze wotměć móhli, je z wulkeho dźěla zasłužba muža, kiž so mjeztym wjele lět za wšo serbstwo hori. Jaromír Jermář, kiž je wot lěta 2006 senator, je so hižo wjacore lěta z mysličku nosył Serbam tajki wusahowacy podij skićić a jich naležnosće zajimowanej zjawnosći spřistupnić. Nětko je wón zarjadowanje z pomocu Towarstwa přećelow Serbow zwoprawdźił a sej tak sam són spjelnił, kaž wón po zakónčenju słyšenja rjekny.

Wo Serbach bě Jaromír Jermář prěni króć w šuli zhonił, kaž so dźensa 61lětny hišće derje dopomina. Tehdyši wučer powědaše wo hoberskich słowjanskich zlětach na horje Mužský pola Mladeje Boleslavy w 1930tych lětach, na kotrychž so tež Serbja prawidłownje wobdźělachu. Zetkanja běchu tak mócne, zo syły ludźi w lěće 1933 hitlerski režim nuzowachu někotrych zajatych Łužiskich Serbow zaso z jastwa pušćić.