Změna zakonja wo wotehnaću zbudźa w Pólskej wulke protesty
Waršawa. Plan, změnić zakoń wo wotehnaću dźěsća, zbudźa w Pólskej wulke spřećiwjenje. Tam wojuja žony wo swobodu, „same rozsudźić směć, što so z njenarodźenym dźěsćom stanje“. Dotalny zakoń dowola wotehnaće w třoch padach – wobsteji-li wulke riziko za žiwjenje a strowotu žony, je-li wona wumocowana a je-li płód w žiwoće ćežko wobškodźeny. W třećim mjenowanym dypku pak ma so po předstawje cyrkwje a knježaceje politiskeje strony Prawo a sprawnosć (PiS) zakoń změnić.
