Bratislava (SŽ/K/SN). Wólby parlamenta w Słowakskej klětu 29. februara drje žanoho wuspěšneho dobyćerja njezměja. Tele wěšćenje da so z decemberskeho woprašowanja za wotpohladami wolerjow sćěhować, kotrež je agentura FOCUS spočatk měsaca přewjedła. Tak drje dotal koaliciska knježaca strona Smer-Socialna demokratija premiera Petera Pellegrinija z 19,6 procentami dale cyle samotna na čole steji, njeje pak – kaž hišće w nowembru – hižo 20 dypkow docpěć zamóhła. Ultranacionalistiska Lúdova strana zlě wuwołaneho ekstremisty Mariana Kotleby porno tomu wo połdra dypka přiby a z 12,8 procentami samo na druhu poziciju zlěze. Za sobu L’SNS wostaja PS/SPOLU, kiž z minusom połdra dypka tónkróć 10,3 procenty dóstanje. Na štwórtym městnje sćěhuje hišće poměrnje młode hibanje Za lúdi něhdyšeho prezidenta Andrea Kiski, kotrež njemóže pak ze swojim njenadźitym zlětom do wyšin pokročować a nawopak z nowemberskich 10,6 procentow na 9,2 procentaj spadnje. Do parlamenta zaćahnyli bychu hišće dalše małe strony.