Marek Krawc rozprawja z čěskeje stolicy za Serbske Nowiny
Praha. Milion chvilek pro demokracii, najwjetša wobydlerska iniciatiwa w Čěskej a najrazniša kritikarka tuchwilneho knježerstwa, je póndźelu z wosebitej akciju na wopory koronapandemije spominała – plester Staroměšćanskeho naměsta w Praze pokry wona z wjace hač 22 000 z krydu namolowanymi křižemi. 22. nalětnika 2020 mjenujcy bě prěni čěski pacient na kowid-19 zemrěł.
Křiže symbolizuja woprowane žiwjenja bjezkonceptnosće statnych zamołwitych dla. „Wjele ludźi móhło hišće žiwych być. Za kowid knježerstwo njemóže, za zemrětych pak ma wšu zamołwitosć“, porokuje Benjamin Roll, předsyda organizacije. Milion chvilek Čechow zdobom namołwja, sej křiž na swój nahubnik narysować. „Mały křiž na nahubniku budźe nam symbol za tuchwilne zaprajenje knježacych, kiž su wobydlerjow cyle jednorje wotpisali, kotřiž jeno swój wužitk widźa a do swojich kapsow wikuja.“
