Namócnosće přećiwo ruskemu wulkopósłancej na pohrjebnišću
Waršawa. Swjatočnosće k róčnicy dobyća Sowjetskeho zwjazka nad nacistiskej Němskej w Druhej swětowej wójnje su w Pólskej tónkróć cyle hinak hač minjene lěta wotměli, přewodźane na kóncu hišće wot diplomatiskeho skandala.
Běchu-li hewak na programje znajmjeńša někotre narěče pólskich politikarjow, kaž prezidenta Andrzeja Dudy, su lětsa ruskeho nadpada na Ukrainu dla wšitke oficialne terminy wotprajili. Składnostnje mjenowaneje róčnicy 8. meje kročachu někotre tysacy demonstrantow wot Palasta kultury k wulkopósłanstwu Ruskeje, zo bychu z pólskimi a ukrainskimi chorhojemi kaž tež z transparentami přećiwo ruskej agresiji protestowali. Na plakatach přirunowachu ruskeho prezidenta Wladimira Putina z Hitlerom.
