Stat a cyrkej w Pólskej tež we wólbnym boju wusko splećenej

Waršawa. W Pólskej stej stat a cyrkej dźělenej, znajmjeńša oficialnje. Woprawdźitosć wšak wupada hinak. Stat trjeba cyrkej z politiskich přičin, cyrkej trjeba stat předewšěm pjenjez dla. Wuska zwjazanosć stata a cyrkwje je na nimale wšitkich oficialnych zarjadowanjach wočiwidna: Bjez zastupnikow cyrkwje w Pólskej dźensa ničo wjace njeńdźe.

Tole je so njedawno zaso raz nazornje pokazało. W Częstochowje, w hnadownym putniskim městnje, je katolski sćelak Radio Maryja 32. róčnicu swojeho wobstaća woswjećił. Přeprošenje na zarjadowanje, kotrež organizuja kóžde lěto kaž jubilej, je wulki dźěl knježerstwa sćěhował. Přichwatali běchu mjez druhim předsyda knježaceje strony PiS Jarosław Kaczyński, zakitowanski minister Mariusz Błaszczak, minister za kubłanje Przemysław Czarnek, minister justicy Zbigniew Ziobro a ministerka za swójby Marlena Maląg. Statny prezident Andrzej Duda je postrowny telegram pósłał.