Marek Krawc rozprawja wo aktualnje rozjimanych temach w Čěskej

Praha. Ruska operowa spěwarka Anna Netrebko chce w oktobru na Praskej koncertnej žurli Obecný dům wustupić. Politiske wjednistwo čěskeje stolicy mjez­tym wo tym debatuje, hač smě ruska sopranistka spěwać abo nic. „Wjetšina z nas je měnjenja, zo nima Anna Netrebko swojeje kontrowersneje zmyslenosće dla za čas ruskeje nadpadoweje wójny w Praze wustupować“, informowaše Jiří Pospíšil, zastupowacy wyši měšćanosta, zašłu póndźelu po wuradźowanju Praskich wodźacych politikarjow. „Smy přeswědčeni, zo by koncert reputaciji čěskeje ­stolicy zeškodźił. Šef Obecneho domu Vlastimil Ježek měł so prócować, zrěčenje z agenturu Nachtigall Artists rozwjazać.“ Pospíšil móže sej předstajić, zo by so koncert přiwšěm, ale hakle po wójnje wotměł. „Z agenturu hižo dołho hromadźe dźěłamy, mamy z njej dobre zwiski. Tohodla je wažne, zo bychu tam zrozumili, zo je koncert wopačne znamjo z Prahi.“ Njebudźe-li móžno, wustup wotprajić, chcedźa dochody z koncerta za pomoc Ukrainje nałožić.