Marek Krawc rozprawja wo aktualnje rozjimanych temach w Čěskej

Praha. W swojej narěči na plenarnej zhromadźiznje UNO w New Yorku wabješe čěski prezident Petr Pavel za podpěru Ukrainy w boju přećiwo Ruskej. Pavel ­hišće raz doraznje wuzběhny, zo woznamjenja wěstota Ukrainy wěstota swěta – wot Afriki hač do Europy, wot Łaćonskeje Ameriki hač do Azije. Wón namołwješe statnych a knježerstwowych šefow swobodneho swěta, Ukrainje tež nadal po­boku stać. Na kóncu swojeho wopyta w Zjednoćenych statach bě sej čěski prezident do brónjernje Colt CZ w Hartfordźe dojěł. Tradicionalne US-ameriske předewzaće słuša wot jutrownika wjacorym čěskim firmam, kotrež produkuja ručne třělne brónje. Pavel ma za wuběrny přikład, „zo móže čěski kapital samo znate wukrajne marki přewzać a Čěskej puć na swětowe wiki rubać.“ W tworni Colt CZ zetka so hłowa čěskeho stata z někotrymi zastupjerjemi firmoweho wjednistwa. Excalibur Army, dalša wulka brónjernja w susodnym kraju móžeše w zašłym lěće swoje dobyće na 13,506 miliardow krónow (534 mio eurow) dźakowano dodawanju brónjow do Ukrainy zwyšić.