Tusk z wuhladami na zastojnstwo ministerskeho prezidenta Pólskeje
Waršawa. Dwaj tydźenjej po wólbach sejma so w Pólskej prócuja zestajeć nowe knježerstwo. Prezident Andrzej Duda je minjeny tydźeń prěnje rozmołwy zahajił a sej zastupnikow opozicije z jeje nawodu Donaldom Tuskom přeprosył, kiž drje ma najlěpše wuhlady na zastojnstwo ministerskeho prezidenta kraja.
Dotal knježaca narodno-konserwatiwna strona Prawo a sprawnosć (PiS) bě drje wólby parlamenta dobyła, swoju dotalnu knježerstwowu wjetšinu pak přisadźiła. Wšako jej za to sydom mandatow pobrachuje. Žana z druhich politiskich stron kraja njeje zwólniwa z PiS w přichodźe hromadźe dźěłać. Porno tomu by Tusk ze zwjazkarjemi swojeje Wobydlerskeje koalicije, kotrejž přisłušeja nimo Wobydlerskeje platformy (PO) hišće Nowa lěwica a zjednoćenstwo wjacorych stron Třeći puć, nowe knježerstwo wutworić móhł. W parlamenće by samo komfortabelnu wjetšinu měł. Tón chce so nowowuzwoleny 13. nowembra prěni króć schadźować.
