Komisija pólskeho sejma přepytuje dźěło bywšeho knježerstwa PiS

Waršawa. Nowe pólske knježerstwo ministerskeho prezidenta Donalda Tuska nima jeničce přichod kraja na starosći, ale chce tež – kaž bě to hižo do wólbow parlamenta připowědźiło – dźěło bywšeho narodno-konserwatiwneho knježerstwa strony Prawo a sprawnosć (PiS) přeslědźić. Za to su mjeztym tři komisije wutworili. Prěnja zaběra so z aferu wizumow dla, kotrež běchu pólske konsulaty w aziskich krajach na dubiozne wašnje wudawali. Dalša komisija přepytuje wobčušlenje opozicije za čas knjejstwa PiS z pomocu programa „Pegasus“ israelskeje tajneje słužby. Wobčušlili wšak njeběchu jenož opoziciju wokoło Tuska, ale samo swójskich ludźi. Třeća skupina rozestaja so z wólbami prezidenta lěta 2020, jako běchu koronakrizy dla krótkodobnje listowe wólby přihotowali a za to wjace hač 70 milionow złotych wudali. Na kóncu přewjedźechu wólby na tradicionalne wašnje. Listowe wobalki wostachu ležo, a pjenjezy su fuk.