Marek Krawc rozprawja wo aktualnje rozjimanych temach w Čěskej

Praha. Bamž Franciskus je so přeco najbóle za njesprawnosć ćerpjacych ludźi zasadźował, pisa čěski premierminister Petr Fiala po smjerći hłowy katolskeje cyrkwje na socialnej platformje X. Franciskus wuprudźowaše čłowjeskosć a pokornosć, podšmórny šef čěskeho knježerstwa, kotremuž bě bamž w juniju 2022 awdiencu poskićił. Za wonkowneho ministra Jana Lipavskeho bě najwyši cyrkwinski dostojnik hłós sobučuća, sprawnosće a nadźije w njewěstym swěće. Andrej Babiš, předsyda najwjetšeje opoziciskeje strony Ano, zwurazni swoje sobužarowanje na platformje X: „Franciskus bě symbol pokornosće, zrozumjenja a čłowjeskosće.“ Podobne słowa napisa čěski prezident Petr Pavel zašłu póndźelu krótko po smjerći pontifeksa. „Za bamža Franciskusa běchu přećelnosć, wěra, pokornosć a zrozumjenje najsylniše hódnoty w njewěstych časach. Je nam inspirěrowace namrěwstwo zawostajił, kiž budźe dale trać“, hódnoći wodźacy politikar.