Afera bydlenja dla wobwliwuje prezidentski wólbny bój w Pólskej
Waršawa. Mało dnjow do wólbow noweho prezidenta debatuja Polacy wo aferje, kotraž móhła na škodu kandidata něhdy knježaceje strony Prawo a sprawnosć (PiS) Karola Nawrockeho być.
W Pólskej je z wašnjom, zo kandidaća za zastojnstwo prezidenta – cyłkownje 13 jich zajutřišim, njedźelu, nastupi – tež swoje cyle wosobinske wobstejnosće zjawnje wotkrywaja. Tak dyrbja sprawnje rjec, kelko pjenjez na swojim konće maja a što hewak hišće wšitko wobsedźa. Tak je kandidat knježaceje Wobydlerskeje platformy, Waršawski měšćanosta Rafał Trzaskowski, přeradźił, zo priwatnje dźesać lět stare awto wužiwa. Ludźo chcychu tež wědźeć, kelko bydlenjow kóždy z kandidatow ma. Kandidat PiS Nawrocki twjerdźeše, zo je přewšo skromny čłowjek a zo ma, kaž kóždy normalny Polak, jeničke bydlenje. Žurnalisća pak spěšnje wuslědźichu, zo tomu tak njeje a zo ma tón hišće dalše bydlenje w Gdańsku. Tele „misnjenje“ wšak njeby žadyn skandal było, njeby-li so wukopało, kak je Nawrocki k bydlenju přišoł.
