Pomoc za Ukrainu towaršnosć a politiku w Pólskej wužaduje

Waršawa (dpa/SN). Wulka wjetšina Polakow je po najnowšim woprašowanju přećiwo tomu, zo so jich kraj w móžnej skupinje wobdźěli, kiž móhła so wo měr w Ukrainje postarać. Za wupósłanje pólskich wojakow so jeničce 17,3 procenty woprašowanych wuprajichu. 61,1 procent wupraji so přećiwo tomu. Zbytnym 21,6 procentam je to smorže. Tole je wuslědk aktualneho woprašowanja agentury za slědźenje za měnjenjemi SW Research w nadawku nowiny Rzeczpospolita. We woprašowanju je wjace muži hač žonow přećiwo tomu, zo so pólske wójsko na tute wašnje zasadźuje. Tež woprašowani, kiž su młódši a we wjetšich městach bydla, zasadźenje skerje wotpokazuja. 19. a 20. awgusta běchu so dohromady 800 Polakow woprašeli. Mjeza Pólskeje a Ukrainy je dlěša hač 500 kilometrow. Hižo wjacore měsacy wšelke europske kraje wo tym diskutuja, hač dyrbjeli wosebitu skupinu wojakow zarjadować, kiž po kóncu wójny měr w Ukrainje zaruči. W februarje hižo bě ministerski prezident Donald Tusk rjeknył, zo so Pólska na tajkej operaciji njewobdźěli.