Komisija přepytuje wuskušowanski program pólskeho knježerstwa PiS

Waršawa. Jako sedźeše bywši justicny minister Pólskeje Zbigniew Ziobro předwčerawšim, wutoru, w lětadle do Waršawy, wón njewědźeše, zo na lětanišću ­stolicy policija na njeho čaka. Zastojnicy mějachu nadawk, přiwjezć 55lětneho ­zapósłanca PiS do twarjenja sejma na přesłyšowanje. Tam wočakowaše jeho komisija parlamenta, kotraž přepytuje mjeztym dwě lěće aferu z časa knjejstwa strony Prawo a sprawnosć (PiS), kotraž bě w lětach 2015 do 2023 na mocy.

Knježerstwo narodnokonserwatiwneje strony PiS bě swój čas wuskušowanski program israelskeje tajneje słužby Pegasus kupiło, wzawši za to 25 milionow ­złotych z fondsa za wopory namocy. ­Oficialne wopodstatnjenje njewšědneje transakcije bě bój přećiwo korupciji. Hižo tehdy pak na to tukachu, zo program w prěnim rjedźe tomu słuži wuskušować opoziciju a kritikarjow knježerstwa.