Marek Krawc rozprawja wo aktualnje rozjimanych temach w Čěskej
Praha. Wuknjenje cuzych rěčow spěchuje zamóžnosć myslenja. Nimo toho móža so wuknjacy lěpje z cuzej kulturu identifikować. Tole je tež zastupjerjam awstriskeho, francoskeho, němskeho, šwicarskeho a španiskeho wulkopósłanstwa znate, kiž zetkachu so minjeny štwórtk w Praze na konferency wo wjacerěčnosći. Mjezynarodne zarjadowanje, na kotrymž wobdźělnicy wosebje wo tym diskutowachu, kak móža wuwučowanje cuzych rěčow hišće lěpje podpěrać, je so hižo 14. króć wotměło. Tež ramikowe wučbne plany a cuzorěčna wučba w jednotliwych předmjetach słušachu do wažnych programowych dypkow.
Prěnju cuzu rěč wuknu čěske dźěći wot 3. lětnika. Po nowym ramikowym kubłanskim programje maja hižo w 1. lětniku z jendźelšćinu započeć. Poskići-li šula w 1. lětniku hinašu rěč, maja so dźěći tam najpozdźišo w 4. lětniku z jendźelšćinu zaběrać. Po nowych wučbnych planach je druha cuza rěč winowatostna. Wuknjacy móža mjez němčinu, francošćinu a španišćinu wolić. Nowe ramikowe wučbne plany maja wot septembra 2027 płaćić.
