Marek Krawc rozprawja wo aktualnje rozjimanych temach w Čěskej

Praha. Zastupjerjo turistiskeje branše zhladuja na jara wuspěšne lěto 2025. Tak zličichu w Čěskej cyłkownje 60 milionow přenocowanjow wukrajnych turistow. 24 milionow ludźi z cyłeho swěta bě w susodnym kraju po puću, to su štyri procenty wjace hač w lětach do toho. Kak statna turistiska agentura ličby posudźuje? „Z wuwićom našeho sektora w Čěskej smy poprawom spokojom. Smy mjenujcy nowy rekord docpěli. Na tamnym boku pak přebywaja turisća zwjetša jenož tři a poł dnja w našim kraju. Hižo třinaće lět prócujemy so tutón trend změnić, dotal bjez wuspěcha. Bychu-li wopytowarjo dlěje hač tři dny wostali, bychu sej snano tež jednotliwe regiony našeho kraja wobhladali“, měni František Reismüller, direktor agentury Czech Tourism.