Młodźinscy koordinatorojo Zapadołužiskeho koparskeho zwjazka (WFV) su so njedawno, kaž kóžde lěto, zešli. W Małym Wjelkowje je so team hosćićelskeho sportoweho towarstwa Mały Wjelkow 1920 wo wuběrne wuměnjenja postarał. Tón abo tamna z nimale 60 přitomnych z 45 towarstwow so nad ponowjenymi rumnosćemi dźiwaše. Wšitcy pak so dźakowano wutrobnej hospodliwosći jara derje čujachu. Prezident WFV Carsten Bergk a nawoda zetkanja, předsyda młodźinskeho wuběrka Andreas Lischke posedźenje z wutrobnymi postrownymi słowami zahajištaj a dźakowaštaj so wšitkim za jich čestnohamtske dźěło a sportowym přećelam we wšěch towarstwach za dźěło z dorostom. We wobłuku tři hodźiny trajaceho zetkanja wobrěčachu kaž přeco mjez sobu ramikowe wuměnjenja, kotrež maja přichodnu sezonu 2026/2027 za hrajny zawod zwjazowace być. Za to budźe młodźinski wuběrk WFV w bórze wšitke přihoty dorěčeć a rjadować.

Dźakujemy so wšitkim přitomnym za kaž přeco zaměrnu diskusiju z porjadnymi wuslědkami. Prosymy wuraznje wo daledawanje informacijow w towarstwach.