ST Porchow – Sokoł Ralbicy/Hórki 1:4 (1:2)

Zestawa hosći: Schöne – B. Heidorn, P. Woko, Šewc, R. Šnajder (70. Bejmak), Korjenk, Mikławšk (92. Kunze), Hicka (90. J. Šołta), Mjechela (90. Schultz), N. Šnajder, P. Šołta (77. L. Heidorn)

Minjenu njedźelu, młode jutry, je delanski cyłk w štwórćfinalu wokrjesneho pokala w Porchowje nastupił. Tamniše mustwo hraje klasu niže we wokrjesnej lize, hdźež steji na dobrym druhim městnje. Loni kónc julija běchu Sokoljo w Małym Wosyku přećiwo Porchowej testowu a přihotowansku hru 7:2 dobyli. Zo budźe pokalna partija tónraz wo wjele ćeša, běše hrajerjam runje tak kaž trenarjomaj Christophej Gloxynej a Tomašej Hicce jasne. Wědźo, zo Sokoljo lětsa hišće ani jeničku wonkownu hru dobyli njesu, žadaše sej Christoph Gloxyn do hry połnu koncentraciju, zo njebychu so njetrjebawše zmylki stali.