Marek Krawc rozprawja wo aktualnje rozjimanych temach w Čěskej

Praha. Nahuat Pipil su indigeny lud w El Salvadorje. Jich prjedownicy su před něhdźe tysac lětami z Mexika na teritorij dźensnišeho małeho srjedźnoameriskeho stata zapućowali. Poprawom su woni přiwuzni Actekow. W El Salvadorje pak wuwichu w běhu lětstotkow swójsku kulturu a rěč. Woboje su w ertnej formje přichodnym generacijam dale dawali.

Čěscy wědomostnicy nětko stawizny a rěč tohole małeho luda dokumentuja. Hispanistka Athena Alchazidu z Masarykoweje uniwersity w Brnje často w El Salvadorje­ přebywa, zo by so tam z poslednimi znajerjemi tradicijow Nahuat Pipil zetkawała. Na tajkich zetkanjach wona zhoni, zo hraja skorpawy wěstych mórskich šlinkow w kulturje indigeneho luda wažnu rólu. „Actekojo wužiwachu skorpawy jako truby, z kotrymiž připowědowachu swojim sobučłowjekam wažne podawki. Tutón nałožk namakach tež pola Nahuat Pipil w El Salvadoru“, wědomostnica­ wuzběhuje.