Prěni němsko-pólski zwjazk knihownjow a archiwow załoženy

Frankfurt n.W./Słubice (RD/SN). Mjezy přesahowacy zwjazk knihownjow a archiwow k mjezsobnej pomocy w nuzowych padach su tele dny w Frankfurće nad Wódru załožili. Jemu přisłušeja knihownja a archiw Europskeje uniwersity Viadrina w Frankfurće n. W., biblioteka Collegiuma Polonicuma w pólskich Słubicach, w samsnym měsće zaměstnjeny archiw Karla Dedeciusa, Frankfurtski archiw zarjada za stasiakty a archiw města Frankfurta nad Wódru. „Po wšej Europje je hakle jara mało tajkich zwjazkow archiwow a bibliotekow. W němsko-pólskej kónčinje je to prěni zwjazk scyła“, wuswětla zarjadniski direktor Collegiuma Polonicuma, Krzysztof Wojciechowski.

Dokelž parkowachu njeznaći swoje awta nastajnosći na dworje Elmara Mahlinga w Ulmje, je sej wón skerje njewabjacy poskitk šoferam wumyslił. Tak připrawi wobsedźer dwora tafličku: Priwatne parkowanišća, kóžda zahajena hodźina płaći 80 eurow. Po wšěm zdaću tale strategija funguje. Mahling zwěsća dale a mjenje parkowacych awtow. Jeničce z jednym wodźerjom měješe 64lětny dotal ćeže.

Hižo lěta trajaca rozkora wokoło hewrjekacych honačow na dworje plahowarja we wsy Zitz blisko Podstupima dale dźe. Tak měješe wobsedźer nětko dopokazać, zo kapony scyła tajku haru nječinja a zo je wołanje na městnje tak z wašnjom. Skoržićel pak měješe ličbu honačow minjenych měsacow na dworje plahowarja dokumentować. Dźensa zetkaštej so wobě stronje na sudnistwje, zo byštej swoje wuslědki předpołožili.