To a tamne (26.09.23)
Hejateho kołpja přeswědčił je fachowc za kołpje Olaf Nieß w Hamburgu a je za to wjele připóznaća žnjał. Zwěrjo bě na dwórnišću měšćanskeje podzemskeje železnicy U 1 pod wagon zalězło a so spjećowaše, so zaso zminyć. Na to dyrbjachu železnisku čaru zawrěć a busy a taksije zasadźić. Přiwołanemu fachowcej so skónčnje poradźi, „kołpja přeswědčić“. Železnicarjo dźakuja so tež zwěrjeću za kooperaciju na dobro jěducych.
Rjedźenje Braniborskich wrotow po nadpadźe z barbu ze stron škitarjow klimy drje dołho traje a budźe dróše hač myslene. Na wjacorych městnach, kotrež běchu aktiwisća tydźenja z barbu popryskali, su minjene dny wšelake techniki rjedźenja wuspytali. Wuslědki chcychu sej fachowcy dźensa wobhladać. Najwjetši problem je struktura pěskowca, do kotrehož je so barba zadobyła. Horca woda abo wysoki ćišć wody móhli škody načinić. Dotal planowane kóšty 35 000 eurow za rjedźenje drje njedosahaja.
Přećiwo wumjezowanju
Köln (B/SN) Katolski Augsburgski biskop Bertram Meier je na swjatočnosći składnostnje 50lětneho wobstaća Zwjazka islamistiskich kulturnych centrumow (VIKZ) wumjezowanje muslimow kritizował. „Štóž ludźi po pochadźe a wěrywuznaću ponižuje, tón zrani čłowjeske prawo.“ Zwjazkowy prezident Frank-Walter Steinmeier měni: „Dźensa słuša mnohotnosć islama z wjace hač pjeć milionami muslimow w 300 wosadach k našemu krajej.“
Wopory namocy
Mnichow (B/SN). Při pospyće zawlečenja wosadneho fararja w nigeriskej wsy Fadan Kamantan su jeho dom zapalili. 25lětny student měšnistwa tam w płomjenjach zahiny. Hačrunjež je njedaloko farskeho domu wojerska jednotka zaměstnjena, njeje nichtó pomhał. W lěće 2022 su w Nigeriji štyrjoch měšnikow morili a 28 zawlekli.
Měrowe myto biskopej
AfD w Nordhausenje zwrěšćiła
Nordhausen (dpa/SN). AfD je při wólbach wyšeho měšćanosty w durinskim Nordhausenje zwrěšćiła. Bjezstronski mějićel zastojnstwa Kai Buchmann je so wčera při wólbach w rozsudnym kole přećiwo kandidatej AfD Jörgej Prophetej přesadźił. Tole zdźěla wólbny běrow města. Po wuličenju hłosow je Buchmann 54,9 procentow hłosow dóstał, Prophet 45,1 procent. Wólbne wobdźělenje wučinješe 59,3 procenty. 61lětny Buchmann ma mandat přichodnych šěsć lět.
Armenjenjo wopušća domiznu
Eriwan (dpa/SN). Po zdobyću kónčiny Hórskeho Karabacha w južnym Kawkazu přez wójsko Azerbajdźana tam bydlacy Armenjenjo swoju domiznu přiběrajcy wopušća. Hač do dźensnišeho ranja su w Armeniskej nimale 3 000 ćěkancow z Hórskeho Karabacha zličili, knježerstwo w Eriwanje zdźěla. Azerbajdźanske wójsko bě kónčinu minjeny tydźeń zdobyło a Armenjanow ke kapitulaciji nuzowało. Tući boja so nětko wuhnaća a wjećby Azerbajdźana spjećowanja dla.
Odessa nadběhowana
Pomocnikaj kładźetaj na 20. mišterstwach němskeje wo najwjetši ...
Kretschmerza krute kontrole při mjezach
Berlin (dpa/SN). Wonkowna ministerka Annalena Baerbock žada sej w politice ćěkancam napřećo rozrisanje na europskej runinje. Połoženje w komunach je absolutne napjate, rjekny politikarka Zelenych dźensa rano rozhłosownikam. Tohodla dźěła wona ze zwjazkowej nutřkownej ministerku Nancy Faeser (SPD) na tym, „zo docpějemy w Europje skónčnje zhromadne rjadowanje k azylowej a migraciskej politice“. Trěbnej stej struktura a porjad. Na wonkownych mjezach EU měli jasne prawidła knježić, zo „móhli ćěkancow skónčnje na rjadowane wašnje po Europje rozdźělić“. Wona žada sej spěšne azylowe jednanja na wonkownych mjezach a spěšne wotsunjenje. Tuchwilu zastupnicy čłonskich statow EU wo zhromadnym europskim azylowym systemje wuradźuja, z kotrymž chcedźa mjez druhim njeregularnu migraciju do Europskeje unije wobmjezować.
Směrnicy twarjenja změnić
Wjerškowe zetkanje twarskeje a bydlenskeje branše z knježerstwom
Berlin (dpa/SN). Do dźensa so wotměwaceho wjerškoweho zetkanja twarskeje a bydlenskeje branše w kanclerskim zarjedźe je zwjazkowe knježerstwo po informacijach medijow paket naprawow wobzamknyło, z kotrymiž chcedźa twar bydlenjow pospěšić. Mjez druhim chcedźa planowane přiwótřenje energijowych směrnicow při nowych twarjenjach zběhnyć. Twarska branša hižo dlěje kritizuje, zo nowe předpisy EH-40 nastupajo ćopłotnu izolaciju twarstwo haća, dokelž kóšty dale ćěrja a ludźi přiběrajcy wottraša. Tež planowane winowatosće ponowjenje starych twarjenjow je knježerstwo najprjedy raz zběhnyło.
To a tamne (25.09.23)
„Lěsny mops čo. 20“ ma wot jutřišeho zaso w Brandenburgu nad Habolu, w ródnym měsće karikaturista a kabaretista Loriota stać. Před lětom běchu skulpturu mopsa pokradnyli. Město bě je narunać dało. Kult wokoło małeho brjuchateho psa – kotrež Loriot wosebje lubowaše – bě wuměłc sam nastorčił: „Žiwjenje bjez mopsa je móžne, ale bjez zmysła.“ Po měsće rozdźělenych steji 27 bronzowych figurow „lěsneho mopsa“. Loriot by 12. nowembra swoje stoćiny woswjećił.
Přećiwo zdźěla chaotiskim poměram na rěkach a kanalach Berlina su čołmarjo a wjesłowarjo wčera protestowali. „Je dale a strašniše za wodowy sport“, rjeknychu zamołwići Treptowskeho wjesłowarskeho zjednoćenstwa. Hłowny problem su wulke motorowe čołmy, kotrež móžeš bjez jězbneje dowolnosće wužiwać. Tute „partyjowe čołmy“ druhich wohrožuja.
Mjezsobne wumjetowanja
New York (dpa/SN). Po zdobyću wot Armenjanow wobsydleneje kónčiny Hórski Karabach přez Azerbajdźan stej sej wobaj krajej w Bjezstrašnostnej radźe UNO mjez sobu raznje wumjetowałoj. Armeniska rěčeše wo „etniskim wučisćenju“ přez azerbajdźanskich wojakow. Azerbajdźan mjenowaše wojerske zasadźenje před najmócnišim gremijom zjednoćenych narodow „antiterorowu naprawu“. Wonkowna ministerka Annalena Baerbock (Zeleni) žadaše sej kónc namocy.
Aiwanger a Schuster so zetkałoj
Mnichow (dpa/SN). Po aferje antisemitiskeho lětaka w šulskim času bayerskeho hospodarskeho ministra Huberta Aiwangera dla staj so politikar a prezident Centralneje rady Židow w Němskej Josef Schuster k rozmołwje zetkałoj. „Rozmołwa bě wěcowna“ Schuster po zetkanju w Mnichowje zdźěli. Najebać to ma wón wobchadźenje Aiwangera z wumjetowanjemi přećiwo njemu za problematiske. „To sym jemu tež takle rjekł.“
Unija namołwja Scholza
