Kónčne pokalne hry

Zapadołužiski koparski zwjazk přewjeduje wot dźensnišeho hač do njedźele kónčne pokalne hry, a to we Wojerowskim Friedricha Ludwiga Jahnowym stadionje na Hasy Liselotty Herrmann pola tamnišeho koparskeho kluba.

28.06. 18.30 HZ Rakecy – Módro-běli Kulow (stari knježa)

29.06. 10.30 ST Horni kraj Sprjewja – HZ ST 1922 Radwor (młodźina B)

29.06. 13.30 HZ Hnašecy-Dobruša – ST Langburkersdorf (ž)

29.06. 15.30 ST Wjelećin – TSV Wachau (mužojo)

30.06. 10.30 TSV Połčnica 1920 – Budissa Budyšin II (młodźina C)

30.06. 13.30 HZ Kubšicy – HZ Ramnow (młodźina A)

Hašenski dorost so wubědźuje

We wobłuku swjedźenskeho kónca ty­dźe­nja dźesać lět Młodźinska wohnjowa wobora Ralbicy-Róžant wubědźuja so dorostowi wobornicy jutře, 29. junija, wot 14 hodź. w Ralbicach. Nimo toho su wot pjatka do njedźele sportowcy ze Spáleneho Poříćí na čěsko-serbskej wuměnje w Delanach. Tak přewjedu jutře w 17 hodź. koparsku hru Ralbicy – Spálené Poříčí.

Bičwolejbulowy turněr

Sportowe towarstwo Marijina hwězda zarjaduje jutře, sobotu, wot 13.30 hodź. bičwolejbulowy turněr, a to při sportnišću w Pančicach-Kukowje.

Soccer-cup

FSV Łuty – SJ Chrósćicy II 1:1 (1:1)

Zestawa hosći: B. Klimant – T. Klimant (83. M. Dórnik), Mark (45. Šołta), Dehn, Lešawa, Donat, A. Dórnik, Matješk, Zynda, Liznar, Šmit

Na kóncu sezony bě sej druhe koparske mustwo Chróšćanskeje SJ do Łutow dojěło. A měješe jasny zaměr, z třomi dypkami w tabulce wot dwanateho hišće na dźewjate městno so dóstać.

Start so hosćom derje poradźi. Tak mó­žachu hižo po pjeć mjeńšinach juskać, jako Stefan Liznar přećiwniskemu wrotarjej žanu šansu njeda a wólny kop Nicka Lešawy do dołheho kuta zhłójč­ko­wa. Ale wjeselo so pominy, jako Łutow­čenjo po štwórć hodźinje wurunachu. Flanka do Chróšćanske­je šěsnatki docpě jeno škitarja, tón pak njezamó situaciju rozrisać a tak hraješe kulowatu kožu swobodnje stejacemu přećiwnikej do nohi. A wón njeměješe žane ćeže ju k 1:1 do wrotow sunyć. Po furioznym spočatku so hra změrowa. Domjacy wšak wědźachu trochu lěpje z chětro twjerdym trawnikom wobchadźeć. Tak bychu so jim po spěšnym nadběhu nimale dalše wrota poradźili, jako nadběhowar bul wyše Tomaša Klimanta połoži. Klemens Mark pak hišće na wrotowej liniji zastatkej zadźěwa.

Při horcych temperaturach je so podłu a wokoło Bjerwałdskeho jězora na jednej z pjeć połnych distancow na 0,8/3, 5, 10 a 21,1 km (połmarathon) cyłkownje 547 lubowarjow běhanja, mjez nimi 20 we walkingu, wubědźowało.

Dobry dźesatk serbskich atletow je so na bě­hach wobdźělił a sej jedne złote kaž tež jedne slěborne městno zawěsćił. We wotpowědnych starobnych klasach wobsadźichu Serbja pjeć medaljowych městnow – tři slěborne a dwě bronzowej, a k to­mu stajnje jedne štwórte, pjate, dźewjate, dźesate, jědnate, 14. a 16. městno. Sportowcy běchu ze Sakskeje a z Braniborskeje, Berlina, Mnichowa, Bad Tölza a z pólskich Żarow.

Na 0,8 km wubědźowachu so šulerjo a šulerki U 8 a młódši. Willi Bjarš z Budyšina běše cyłkowny dobyćer (3:12 min). We wurisanju na 5 km (101 w cilu) docpě Fritz Bjarš z Budyšina slěborne městno w 19:02 min. Dawid Žur z Lejna doběža w U 16 na 9. městnje (26:28 min). Na tej distancy je tež cyłkownje 20 lubowarjow walkinga mocy měriło.

Na Budyskim Serbskim gymnaziju wotmě­štej so na cilowej čarje šulskeho lěta 2018/2019 tradicionalnej wolejbulowej hrě. 27. duel muskeje generacije rozsudźichu dwanatkarjo 2:1 přećiwo wučerjam, a jubilejny 10. duel dobychu abiturientki 2:0 přećiwo wučerkam.