Wochožansku brunicowu jamu měli pomjeńšić a minimalny wotstawk 400 metrow wot jeje kromy k Rownomu a Mułkecam zachować. Wobě wsy měłoj žiwjenja- a wuwićahódnej wostać. Wot jamy potrjecheni dyrbjeli w přichodnej wuhlowej komisiji zwjazkoweho knježerstwa sobu skutkować.

Rowno (AK/SN). To wšo podšmórnychu wobdźělnicy protestneho pućowanja inicia­tiwneho zwjazkarstwa „Strukturnu změnu nětko – žane Wochozy II“ njedźelu na městnje. Ze symboliskej čerwjenej liniju podłu dróhi wot Slepoho do Mi­łoraza woni swoje žadanje wujasnichu. „Wu­dobywanska hranica měła so tu kónčić“, rjekny Friederike Böttcher, sobuzałožerka zwjazkarstwa. „Wjeselimy so nad mnohimi wobdźělnikami. Dźakujemy so za solidaritu, kotraž saha hač do Nje­bjelčic, do Delnjeje Łužicy, do Čěskeje.“ 120 ludźi je sobu demonstrowało, zdźěli policija. Mjeztym pjate protestne pućowanje wjedźeše wot Slepjanskeho dwórnišća hač k sportnišću w Rownom. Serbski wuměłc „Geigerzähler“ je zarjadowanje hudźbnje podpěrał.