W poslednjej sekundźe wurunali

Dienstag, 25. Juni 2019
Artikel bewerten
(0 Stimmen)
Rony Hanuza, kopar prěnjeho mustwa Njebjelčanskeje SJ.  Foto: Jörg Stephan Rony Hanuza, kopar prěnjeho mustwa Njebjelčanskeje SJ. Foto: Jörg Stephan

ST 1896 Wulka Dubrawa

– SJ Njebjelčicy 4:4 (2:1)

Zestawa hosći: Matješk – Hanuza, Gödig, Hrjehor, Krall, Čornak, Hommel (50. Šołta), O. Domš, Plaettner, Korjeńk, Lejnart (65. F. Domš)

Poslednja hra sezony wjedźeše chowancow koparskeho trenarja Njebjel­­čanskeje SJ Handrija Krawčika k dźesa­temu tabulki do Wulkeje Dubrawy. Domjacu partiju běchu woni 7:0 dobyli. Jako­ pak nětko Wulkodubrawčan Danilo Miekan w 69. min. 4:1 třěli, hižo nichtó w rjadach hosći tak prawje do wuspěcha njewě­rješe. Takrjec z wothwizdanjom pak trjechi Pawl Hrjehor k 4:4 (94.), a wjeselo bě wulke.

Hižo po štyrjoch mjeńšinach bě Wiliam Plaettner z hłowu po wólnym kopje Ronyja Hanuzy nawjedowanje docpěł. Žane dźesać mjeńšin pozdźišo pak Miekan z dwójnym dyrom (13., 16.) mjezywuslědk zwjertny.

Po přestawce běchu Wulkodubrawčenjo w centralnym srjedźnym polu prezentniši, tak zo móžachu finalnu přihrawku za dalše wrota dosć derje při­hotować. Třělc dalšich dwójnych wrotow rěkaše znowa Danilo Miekan (62., 69.). Po tym pak sta so to njewěrjomne. Město dalšej škodźe za­dźěwać hrajachu Njebjel­čenjo njebojaz­liwje doprědka. Wosebje Pawl Hrjehor nětko prawe křidło chětro wobdźěłowaše. Někotre sekundy po za­kopje pósła wón Olive­ra Domša, kiž třěli bul nisko k 4:2 do dołheho kuta (70.). W 86. min. Hrjehor róžk spěšnje wuwjedźe a Plaettner stłóči pas přez wrotowu liniju k 4:3. Domjacy běchu chětro nerwozni a hrajachu na čas. Jako měješe sudnik hwižk hižo w hubje, klepny Gabriel Čornak bul tež raz do­prěd­ka. Po stacijach Jakub­ Šołta, Handrij Korjeńk, Florian Domš a Pawl Hrjehor, tón na 4:4 wuruna.

Facit: Remis bě kaž dobyće, Njebjel­čenjo pokazachu wuběrnu moralku.

Tadej Cyž-Njebjelčanski

Veröffentlicht in Sport
Bitte anmelden, um einen Kommentar zu posten

Anzeige