Stara technika ludźi stajnje znowa ­fascinuje. Tohodla su zetkanja oldtimerow woblubowane zarjadowanja. ­ W Dubrawje pola Grodka bě wone zdobom předpowědź na bórzomny jubilej.

Grodk (JoS/SN). 37. zetkanje oldtimerow wotmě so minjeny kónc tydźenja na motodromje Grodkowskeho motorsportoweho kluba w Dubrawje (Trattendorf). Zarjadowanje steješe cyle w znamjenju swjatočnosćow składnostnje 725. jubileja Grodka. Za to běchu sej čłonojo mo­torsportoweho kluba něšto wosebiteho wumyslili. Při wulkim awtowym kranje wisaše wysoko w powětře a tuž hižo wotdaloka widźomny stary traktor typa Lanz. Jako maskotka motorsportoweho kluba njewitaše historiska mašina jenož mnohich wopytowarjow, ale bě zdobom rewerenca jubilejnemu městu.