Budyšin (SN). 42 Budyšanow, kiž bydla blisko parkowanišća na Schliebenowej dróze, dyrbješe zašłu nóc jědojteho kura dla swoje bydlenje wopušćić. Město je w zakładnej šuli Johanna Gottlieba Fichteho nuzowe přebywanišćo zarjadowało.

Z dotal njeznatych přičin je so wčera popołdnju kontejner palić započał, kotryž bě połny baterijow. Z pomocu baterijow móža chabłanja miliny w měsće wurunać. Něhdźe 90 wohnjowych wobornikow bě zasadźenych, zo bychu woheń hašeli. Na pomoc přijědźe tohorunja techniski pomocny skutk a policija dróhi zašlaha. Připrawu su hnydom hasnyli. Na zbožo njeje naprawy dla k wupadam miliny dóšło.

Po tym zo bě woheń zhašany, wobornicy kontejnery w běhu nocy a dźensnišeho dnja dale chłódźachu, zo bychu termiski proces w baterijach kontrolowali. Za to přetrjebachu 5 000 litrow wody na mjeńšinu. Z tutej naprawu měješe so eksploziji baterijow zadźěwać. Hakle hdyž změja procesy pod kontrolu, móža warnowanje zběhnyć.