Hamtska groteska z transportom šulerjow wot Němcow do Ralbic

Budyšin/Němcy (SN/mb). Štož sej Tereza Čórlichowa přeje, kotraž ze swojej swójbu w Němcach bydli, je poprawom cyle jednore: zo móža tři jeje štyrjoch dźěći ze samsnym awtom šulerskeho transporta do serbskeju šulow w Ralbicach jězdźić. Dwě dźěsći chodźitej tam na zakładnu šulu, najstarši syn wot spočatka šulskeho lěta na wyšu šulu. Do toho je tež wón ze samsnej taksu do Ralbic jězdźił. A w njej je tež dźensa městno za njeho swobodne. Na nim pak Čórlichec hólc wjace sedźeć njesmě, dokelž tutón transport płaći jenož za zakładnych šulerjow. To je zarjad za nadróžny wobchad krajnoradneho zarjada swójbje loni w měrcu pisomnje zdźělił. Z toho časa so Tereza Čórlichowa w telefonatach wo změnu hamtskeho rozsuda prócuje. Nětko je rěčnica krajnoradneho zarjada tež Serbskim Nowinan wobkrućiła, zo spodźiwnu konstelaciju njezměnja – najebać to, zo bychu směli.