Politikarjej CDU wobydlerjam politiske skutkowanje a zaměry předstajiłoj

Budyšin (SN/MiP). Jako přinošk, „politiku CDU wobydlerjam transparentnje předstajić“, pohódnoći předsyda Worklečanskeho gmejnskeho zwjazka CDU André Handrik wčerawše zjawne diskusijne zarjadowanje, na kotrež běchu dwurěčne zwjazki gmejnow CDU „Při Klóšterskej wodźe“ přeprosyli. Něhdźe 30 zajimcow bě so w Smječkečanskim wjesnym klubje zhromadźiło, zo bychu ze Steffenom Roschekom­, direktnym kandidatom CDU we wokrjesu Budyšin za wólby zwjazkoweho sejma, a ze zapósłanču CDU w sakskim krajnym sejmje Elaine Jenčec do rozmołwy přišli. Tež jeje předchadnik w serbskim wólbnym wokrjesu Alojs Mikławšk­ bě přitomny, runje tak kaž předsyda zarjadniskeho zwjazka Při Klóšterskej wodźe Stefan Anders.