Namołwu za wólby Serbskeho sejma w Budyskim dźiwadle předstajili

Budyšin (SN/mb). Zo je předewzaćel Tomaš Rječka z Kamjeneje runja dalšim 25 wosobam namołwu za wólby Serbskeho sejma podpisał, ma ryzy praktiske přičiny: Wón je we wojowanju wo serbsku rjadownju na Radworskej zakładnej šuli zwěsćił, zo tójšto na hračkach steji. To praješe wčera na nowinarskej bjesadźe podpěraćelow 2. wólbow Serbskeho sejma, kotruž je Benedikt Dyrlich w rumnosćach Němsko-serbskeho ludoweho dźiwadła (NSLDź) moderěrował. Serbja su wotwisni wot dobreje wole kultusoweho ministerstwa a krajneho zarjada za šulu a kubłanje (LaSuB). Jeli su nam derje zmysleni, je wšitko w porjadku, hewak nic. Tohodla chce, zo móžemy naše kubłanje sobu postajować. Tuchwilne struktury njedosahaja, snadź móžemy problem ze Serbskim sejmom rozrisać.