Před 25 lětami, jako předewzaće TDDK w Nadróznej Hrabowce załožichu, běše pozdźiši ministerski prezident Stanisław Tilich minister w Sakskej. Milenka Rječcyna je so z nim na jubilejnej ­swjatočnosći rozmołwjała.

Sće sej Wy za swój čas jako minister tajke wuwiće předewzaća TDDK předstajił?

S. Tillich: Jako sym tu prěni raz był, dźěłaše w předewzaću 150 ludźi. Hdyž sym pozdźišo přeco zaso přeprošeny był, jako so nowy wotrězk přepoda, sym so na to zwučił, zo zawod rozrostuje. Z tym je tež ličba sobudźěłaćerjow wobstajnje stupała. Dźensa mamy tule zawod, kotryž młodych ludźi, tež z našeje serbskeje Łužicy, doma dźerži. Njetrjebaja daloko na dźěło jězdźić, ale maja tu w domiznje lukratiwne a dobre dźěło a to w modernym zawodźe. Móžemy wo japanskich mějićelach rjec, zo tam inwestuja, hdźež tež trajnje wostanu. To rěka, zo maja młodźi ludźo tudy dobry přichod.

Po swojim skutkowanju jako ministerski prezident so nětko na wuměnku dale za mjezynarodne hospodarstwo a mjez­sobne zrozumjenje zasadźujeće. Kotry wuznam ma předewzaće TDDK w tutym zwisku?