We wyšej lize stafla juh je Budissa Budyšin doma přećiwo SSC Weißenfels 2:0 (0:0) dobyła. Wrota třěleštej něhdyši šuler Serbskeho gymnazija Budyšin Steve Schröder (72.) a Karl-Ludwig Zech (78.). Z tym maja Budyšenjo po sydom hrach z dwěmaj dobyćomaj, třomi njerozsudnymi wuslědkami a dwěmaj poražkomaj wurunanu bilancu.

W krajnej lize dosahaše za koparjow Biskopičanskeho KT 08 pola SSV Markranstädt jenož za 0:0. Klasu niže w krajnej klasy su hosćo z Radebeula hru w Němskich Pazlicach hižo po 23 mjeńšinach 3:0 (3:0) za sebje rozsudźili. Nowy načolnik wokrjesneje wyšeje ligi je prěnje koparske mustwo Sportoweje jednotki Chrósćicy (SJC) 1981. Cyłk trenarskeje dwójki Waldemar Adamowicz/Feliks Cyž swjećeše wčera dobyće 2:0 (1:0) přećiwo mustwu z Hornjeho kraja Sprjewja. Woboje wrota bě za SJC Jan Bogusz krótko do přestawki (43.) a krótko po njej (47.) třělił. Tež Ralbičanscy Sokoljo zdźeržachu sej wšitke tři ličaki w Delanach. Tam trjechištaj při dobyću 2:0 (1:0) Livius Frencl (37.) a Niklas Šnajder (75.).