To a tamne (18.07.19)
Najnahlišu dróhu swěta maja we Walesu: Ze 37,45 procentami nahłosće je dróha Ffordd Pen Llech w małoměstačku Harlech nowy swětowy rekord nastajiła, kaž Guinnessowa kniha rekordow zdźěla. Dotal bě nowoseelandske město Dunedin z 35 procentami tutón rekord měło. Za nowy rekord přizjewili su so wobydlerjo sami, po tym zo bě so wosobowe awto z přićahnjenymi borzdźidłami po dróze dele sunyło. Zanjesene městačko nadźija so nětko na wjace turistow.
Do pasli zalězła je sej rjedźerka w Kerpenje pola Kölna. Wobydlerjej bydlenja hižo dlěje na to tukaštaj, zo je rjedźerka padušnica. Tuž połožištaj jej bankowku, kotruž sej 52lětna přistajena bjez wahanja do zaka tykny. Přiwołana policija rjedźerku přepytowaše. Nimo bankowki namaka tež wšelake debjenki z druheho bydlenja domu. Padušnicu zajachu.
To a tamne (17.07.19)
Blido na třěše awta transportował a jenož z ruku dźeržał je 66lětny šofer w porynsko-pfalcowskim Wörrstadće. Zastojnikam bě Smart na wjele wužiwanej zwjazkowej dróze napadnył, dokelž sahaštej duri kamora z koferoweho ruma. Na třěše ležeše blido. Te pak njebě přiwjazane, ale ležeše na přikrywje. Šofer je z lěwej ruku přez wokno dźeržeše. Tón njebě sej ani winy wědomy. „Kak hewak by to činić dyrbjał?“, so wón prašeše. Wón dyrbješe blido dele wzać a pokutu płaćić.
Pjećlětny hólc je so w delnjosakskim Celle pola policije požadał. Zhromadnje ze staršimaj přińdźe na stražu, zo by swoje powołowanske přeće wosobinsce přednjesł. Zastojnicy jemu rewěr pokazachu a rozłožichu, zo ma hišće trochu chwile. Přiwšěm sej jeho mjeno hižo raz napisachu. Ze wšelakimi maličkosćemi wobdarjeny hólc stražu zaso wopušći.
To a tamne (16.07.19)
Ličenje kołpjow su wčera na Themsy we Wulkej Britaniskej zahajili. Na wjacorych wotrězkach ptački registruja a zdodom hladaja, kak so jim dźe. Pjeć dnjow trajacy spektakl w Londonje zahaja a njedaloko Oxforda skónča. „Swan Upping“ je britiska tradicija, kotraž pochadźa z 12. lětstotka. Tehdy běchu słužownicy kralowskeho palasta za kołpjemi pytali, dokelž běchu ptački kruty wobstatk kralowskeho jědźneho plana.
Škrěkanje dweju papagajow je w Hessenskej zasadźenje policije zawiniło. Pasantka bě w Heppenheimje žałostne wołanje wo pomoc słyšała a na to policiju wołała, měnjo, zo tam někoho zadaja. Zastojnicy móžachu pad spěšnje wujasnić. W přitomnosći policistow wšak běštej papagajej skludnej. Jedyn sydny so policistce samo na ramjo, hdźež so hwěžki na uniformje błyšćachu.
To a tamne (15.07.19)
Wjace hač tysac kilometrow z awtom po puću byli su štyrjo młodostni w starobje mjez dźesać a 14 lětami w Awstralskej. Policija móžeše skupinu ćeknjenych skónčnje w zwjazkowym staće New South Wales dosahnyć. Dźěći běchu w domjacym Rockhamptonje z awtom jednoho z nanow wotjěli a samo rozžohnowanski list zawostajili. Na dyrdomdejsku jězbu wzachu pjenjezy a material za wudźenje sobu. Motiw młodostnych za wulět njeje hišće doskónčnje znaty.
Awto na awtodróze ćišćeć dyrbjał je šofer na A 4 mjez Hornim Wujězdom a wotpočnišćom Hornja Łužica, po tym zo bě jemu sobotu dopołdnja bencin wušoł. Sta šoferow dyrbješe so na jednočarowej dróze awtodróhoweho twarnišća za 43lětnym „nastupić“. Při tym nasta dźesać kilometrow dołhe haćenje, kotrež so hakle po dobrej hodźinje zaso rozpušći.
To a tamne (12.07.19)
Swój bydlenski mobil mylnje zapalił je 76lětny w durinskim Kammerforsće. Do toho bě z płunowym palakom njerodź wotpalił. Płomjenja pak přeskočichu na třěchu, pod kotrejž campingowy mobil steješe. Muž drje hišće spyta z awtom pod třěchu wujěć, njemóžeše pak je wjace wuchować. Bydlenski mobil a třěcha stej dospołnje zničenej. Wěcna škoda wučinja šwarne 50 000 eurow.
Štóž na horu Zugspitze pućuje a chce w Knorr-hěće přenocować, dyrbi při zachodźe swój spanski měch najprjedy raz do mikrožołmaka tyknyć. 30 sekundow při 600 wattach ma njewitanym hosćom – šćónam – žiwjensku swěcu hasnyć. Njelube překasancy-drapy běchu minjene lěta stajnje zaso problemy w alpskich přebywanišćach načinjeli. Nětko su mějićeljo hětow skutkownu naprawu našli, a pućowarjo su ju přiwzali.
To a tamne (11.07.19)
W škitnych woblekach přećiwo atomowym, chemiskim a biologiskim škódnym maćiznam su wohnjowi wobornicy w Ratingenje pola Düsseldorfa twory za grilowanski wječor nakupowali. Bě to spontany dźěl prawidłowneho zwučowanja specialneje jednotki, kotraž dyrbi nawuknyć z wobmjezowanej komunikaciju, ze špatnym widźenjom a hibanjom wobchadźeć. Grilować wšak smědźachu bjez škitnych woblekow.
Wjace hač 500 myšow w jednym bydlenju nańdźechu sobudźěłaćerjo weterinarneho zarjada w Essenje. Mějićel bě myše dźeržał, bjeztoho zo by je po splahu dźělił. Tak běchu so „bjez kontrole“ rozmnožili. Přiwšěm je so jim w bydlenju wočiwidnje derje šło, hewak njebychu so tak rozmnožili. Weterinarny zarjad ma nětko problem, telko myšow w zwěrjatownjach zaměstnić.
To a tamne (10.07.19)
Chorobne awto pokradnył je 40lětny muž w Remscheidźe. Zo by spěšnišo domoj přišoł, wza sej wón awto, kotrež před chorownju čakaše. Samsny wóz bě jeho hodźiny do toho do chorownje přiwjezł. Kölnscy policisća wšak móžachu muža na awtodróze A3 njedaloko Königsforsta zajeć. Wón bě pjany, nimo toho njeměješe žanu jězbnu dowolnosć.
Wopačni policisća su starušku w Poruhrskej wo złoto a debjenki w hódnoće jednoho miliona eurow wobšudźili. Njeznaći běchu so při telefonje jako policisća wudawali, kotřiž su runje rumunsku cwólbu paduchow zajeli. Paduši mějachu pječa adresu 79lětneje w Dortmundźe při sebi. Radźachu jej drohotne wěcy policiji přepodać a namołwichu ju, złoto a debjenki w płatowych měškach na kěrchowje wotpołožić. Wot skućićelow zatrašena žona je to štyri razy činiła.
To a tamne (09.07.19)
Pozdatne falšowane pjenjezy su w delnjofrankskim Lohru nad Mohanom zasadźenje policije zawinili. Wikowar klawěrow bě ju wołał, dokelž měješe 15 bankowkow po 200 eurach za wopačne, kotrež bě jemu kupc klawěra přepodał. Zastojnicy po dokładnym pruwowanju zwěsćichu, zo běchu pjenjezy płaćiwe, ale mjeztym 17 lět stare. Su tuž hinak wupadali hač dźensniše bankowki.
Paduchow 40 000 prózdnych sadowych kistow su w Meckenheimje pola Bonna zajeli. Mužojo běchu je přez tydźenje stajnje zaso ze składa předawarnje kradnyli. Hłowna přičina: Kóžda kista wunjese štyri eura zastawka. Jedyn ze sobudźěłaćerjow je na nócnej patruli minjeny kónc tydźenja skućićelow wuhladał a policiju informował. Ta móžeše třoch paduchow njedaloko kupnicy zajeć.
To a tamne (08.07.19)
Swójskeho syna wobskoržiłoj staj staršej w Neuruppinje, dokelž bě jeju awto skradźu a bjez jězbneje dowolnosće wužiwał. Do toho běštaj chłostanku přespěšneho jězdźenja dla dóstałoj, na kotrejž bě 28lětny syn jako šofer spóznajomny. Dźeń po tym policisća jeho kontrolowachu a zwěsćichu přeco hišće 2,26 promilow alkohola w kreji. Młody muž wšak zastojnikam klučiki awta dobrowólnje přepoda.
W zawodźe za grilowanske wuhlo a přisłušk w Essenje je w nocy na njedźelu woheń wudyrił. Hašenske dźěła trajachu cyły dźeń, a płomjenja so jara spěšnje rozpřestrěchu. Hłowne twarjenje, hdźež bě material składowany, je so mjeztym sypnyło. Wulkeje horcoty dla njemóžachu so wobornicy hišće k centrumej wohenja předrěć a liča z hoberskej wěcnej škodu. Na zbožo so nichtó njezrani.
To a tamne (05.07.19)
Spodźiwnje wulki narostł je bywši francoski prezident Nicolas Sarkozy a je mjeztym samo wjetši hač jeho žona Carla Bruni. Tak znajmjeńša zdawa so to na foće na titulnej stronje magacina „Paris Match“. Dotal bě Sarkozy stajnje mjeńši hač Carla Bruni był. Po dźiwnych a wusměšowacych komentarach w interneće je magacin wěcku nětko rozjasnił. Fotografowali běchu jeju na schodach, při čimž steješe Sarkozy schodźenk wyše hač jeho mandźelska.
Nošenje žonow steji wot dźensnišeho w srjedźišću swětowych mišterstwow w finskim Sonkajärviju. 34 porikow je přizjewjenych, su mjez druhim z Ruskeje, Francoskeje, Němskeje, USA a Nowoseelandskeje. Mužojo dyrbja ze žonu na chribjeće 235,5 metrow dołhu čaru, połnu zadźěwkow, běžeć.
