To a tamne (07.11.19)

Donnerstag, 07. November 2019 geschrieben von:

Hněwny roznošowar pizzy je ju žonje w delnjosakskim Bückeburgu do mjezwoča stłóčił. Do toho bě wona pječwo při durjach wotpokazała, dokelž bě po jeje měnjenju předołho na nju čakać dyrbjała. Na to bě roznošowar pizzu z tyzy wzał a ju skazarce chětro njegalantnje do mjezwoča stłóčił. Wona je roznošowarja zranjenja ćěła dla policiji přizjewiła.

Z wosom dulemi złota na nohomaj su ruscy cłownicy młodu žonu na lětanišću w ruskim Wladiwostoku lepili. Wona chcyše złoto do Chiny pašować a bě małe dule z lěpjatym paskom na no­homaj přilěpiła. Zastojnikam žona při kontroli napadny, dokelž bě nerwozna a spłóšiwa. Nimale dwaj kilogramaj złota stej po informacijach cła wjace hač 71 000 eurow hódnej. Žonje, kotraž bě w nadawku Chinjanki po puću, hrozy nětko sydom lět jastwa.

To a tamne (06.11.19)

Mittwoch, 06. November 2019 geschrieben von:

Bjez wědźenja staršeju je so dwanaćelětny Würzburgčan z ćahom na puć k přećelej do Nürnberga nastajił. Sto kilometrow do cila pak jeho policisća zadźeržachu. Železnicarce bě samlutki jěducy pachoł w spěšniku ICE napadnył, kiž měješe nimo toho jeničce šulersku jězdźenku poruhrskeje kónčiny při sebi. Staršej wo tym ničo njewědźeštaj. Šula njeje jeju informowała, zo njebě hólc scyła na wučbu přišoł.

Ze schowanej minikameru je 32lětny w Engelskirchenje pola Kölna spytał jězbne pruwowanje zmištrować. Njedaloko twarjenja, w kotrymž pruwowanje bě, móžeštaj kumpanaj přez mobilnoškrič­kowy zwisk wšitke prašenja sobu čitać a pruwowancej přez małe słuchatko we wuchu prawe wotmołwy přišeptnyć. Pospyt pak so nimokuli. Pruwowar to pytny a zawoła policiju, kotraž wšitkich třoch zaja a techniku sćaza.

To a tamne (05.11.19)

Dienstag, 05. November 2019 geschrieben von:

Zhubjeny třilětny hólčk je w šwabskim Bad Wörishofenje zasadźenje policije zawi­nił. 16lětny bratr měješe nje­dźelu popołdnju na njeho kedźbować, je pak sej wusnył. Po tym zo bě zaso wo­tućił, njemóžeše třilětneho po cyłym domje namakać. Prjedy hač zawołana policija dojědźe, młodostny bratřika tola wuhlada, schowaneho pod poslešćom.

Pokradnjeny pomnik Göttingenskeho dźiwadźelnika Heinza Erhardta su dźensa zaso stajili. Tři tydźenje bě pomnik woblubowaneho komikarja zhubjeny, doniž njeje pěšk wobškodźenu stelu na štom zlehnjenu našoł. Je to po wšej Němskej jenički pomnik dźiwadźelnika, kiž bě w Göttingenje wosom filmow nahrawał. Lěta 2003 postajeny pomnik pokazuje, kak Erhardt (1909–1979) w róli policista wobchad rjaduje. Stela je nětko zesylnjena, zo njemóža ju wjace pokradnyć.

To a tamne (04.11.19)

Montag, 04. November 2019 geschrieben von:

Najwjetšu rybjacu soljanku swěta su w Heringsdorfje na kupje Usedom nawarili. Pod dohladom zastupnika instituta rekordow Němskeje je powołanski kuchar André Domke ze sto kilogramow ryby kaž tež z wulkeho mnóstwa papriki, tomatow, kórkow, cyble a korjeninow cyłkownje 268 litrow rybjaceje soljanki zhotowił. Tak bě wuměnjenje instituta spjelnjene, kotryž žadaše sej znajmjeńša 250 litrow. Dźěl poliwki su hnydom předali, zbytk su zawarili.

Jeničce spódnje cholowy a košlu woblečeny je 55lětny šofer wosoboweho awta na awtodróze 65 koleso wuměnił. Dokelž chětro za alkoholom wonješe, dyrbješe wón „duć“ a měješe wjace hač dwaj promilej. Zastojnicy zapodachu skóržbu wopiłstwa za wodźidłom dla. Hač měješe muž alkohola dla tak mało drasty na sebi, njemóžeše policija rjec.

To a tamne (01.11.19)

Freitag, 01. November 2019 geschrieben von:

Nimale 900 000 eurow a 104 kilogramy kokaina w hódnoće pjeć milionow eurow su policisća w Grjekskej sćazali. Zastojnicy běchu bydlenje třoch dealerow w Athenje přepytali a namakanku we wideju dokumentowali. Kokain ležeše w kisće pěska kaž tež we wulkich dulach na blachach a w kachlach. Třo mužojo běchu po wšej Europje aktiwni byli. Wopojny jěd jara dobreje kwality pochadźeše z Łaćonskeje Ameriki.

Z jednorym trikom je lěkar w Hannoveru sydomlětnemu hólcej z nuzy pomhał, kiž bě z jazykom w bleši tčacy wostał, po tym zo bě spytał, brěčku z bleše wulizać. Lěkar móžeše jeho ze smjerćstrašneho połoženja wuswobodźić: Wón suny rołku mjez jazyk a blešu a duješe powětr do njeje. Tak so jazyk, kotryž bě hižo módry a chětro nabubnjeny, z bleše wutłóči. Něšto dnjow po tym bě wšo zaso w porjadku.

To a tamne (30.10.19)

Mittwoch, 30. Oktober 2019 geschrieben von:

Paduch ze zagipsowanej nohu njeje w Dortmundźe spěšnje dosć ćeknyć móhł a sedźi nětko w jastwje. Najprjedy běchu jeho w kupnicy lepili, kak baterije kradnje, a policiji přepodali. Dźeń po tym jeho znowa při kradnjenju lepichu a spěšnje dosahnychu. Dokelž běchu 41lětneho w Berlinje hižo wospjet zasudźili, tykny jeho sudnik do jastwa.

Dokelž běchu hašišowe tykančki jědli, dyrbješe šěsć młodostnych lěkarja wołać. Na priwatnym swjedźenju w Darmstadće běchu sej woni trochu přewjele „hašbrowniejow“ popřeli. Njeběchu pak sej wuskutkow drogoweho pječwa wědomi a dyrbjachu do chorownje. Jedyn z hosći bě telko do so stykał, zo so samo zwjeze.

To a tamne (29.10.19)

Dienstag, 29. Oktober 2019 geschrieben von:

Britiski husler je swoju drohotnu, 310 lět staru wiolinu w ćahu zabył. Hladajo na stratu něhdźe 290 000 eurow droheho instrumenta je wón dospołnje zludany, rozprawja hudźbnik Stephen Morris. Jedna so wo wiolinu Davida Tecchlera z časa baroka. Jeho instrumenty najlěpši hudźbnicy wužiwaja. Morris, kiž w Londonje bydli, je hižo wuměłcow, kaž su to Andrea Bocelli, David Bowie a Steve Wonder, na koncertach přewodźał. Dyrbjał-li něchtó husle w běłym kófru namakać, njech so pola njeho přizjewi, Stephen Morris prosy.

Njeznaty šofer awta je w poruhrskim Hagenje parkowacy Opel wobškodźił a njewšědne poselstwo zawostajił: Na popisanej serwjeće při woknje awta steješe: „Sorry, dyrbjach so wuwinyć a nimam pjenjezy.“ Wopor, 43lětna mějićelka Opela, přepoda pismo policiji, kotraž nětko za swědkami pyta.

To a tamne (28.10.19)

Montag, 28. Oktober 2019 geschrieben von:

Wumyslena stawiznička dweju dźěsći rozbitych škleńčanych duri dla je w Bayerskej wulkozasadźenje policije zawinowała. Wosom a dźesać lět starej holca a hólc staj nanej napowědałoj, zo bě jeju čorny zdrasćeny a zakukleny muž w by­dlenju w Moosthenningu nadpadnył. Při tym bě zadobywar hłowu dźesaćlětneho do duri dyrił. Policija na to z wja­corymi awtami za mužom pytaše. Wo­spjetne woprašowanje dźěsći pak wunjese, so bě so hólčec při šćěkanju ze sotru zakopnył a durje rozbił.

Z rekordnej ličbu wopytowarjow su so Essenske wiki hrow skónčili. Na wšě 209 000 ludźi bě minjene dny wiki za njeelektroniske hry wopytało, telko kaž hišće nihdy. Zarjadowarjam je to dopokaz, zo su tradicionalne hry tež w elektroniskim času prašane.

To a tamne (25.10.19)

Freitag, 25. Oktober 2019 geschrieben von:

21 kupjelow, dwanaće spanskich stwow, tři gurmejowe kuchnje, dwě winowej pincy a hoberski pool: Po wjace hač dwěmaj lětomaj na imobilijowych wikach ma luksusowa wila w kaliforniskim Bel Air noweho wobsedźerja. „Billionaire“ mjenowany megaobjekt su za 94 milionow dolarow předali. Objekt běchu lěta 2017 w hórkach pola Los Angelesa natwarili. Za štyriposchodowy dom z 3 530 kwadratnymi metrami bydlenskeje płoniny chcychu 250 milionow dolarow měć. Žadyn kupc pak njebě so našoł.

Do jastwa zadobył je so 18lětny w delnjosakskim Vechta. Chcyše jeno ze swojej zajatej přećelku rěčeć a ju tak wróćo zdobyć. Krótko do toho bě so wona telefonisce wot njeho dźěliła. Młodostny bě štyri metry wysoku murju přewinył a po lěsycach woknow hač k celi přećelki zalězł. Přistajeni jastwa pak jeho zadźeržachu.

To a tamne (24.10.19)

Donnerstag, 24. Oktober 2019 geschrieben von:

Kruwa w rěce je w Porynsko-Pfalcy wul­ko­zasadźenje wohnjoweje wobory zawinowała. „Z ćežkim ćělnym dźěłom“ so wohnjowym wobornikam po wjacorych hodźinach poradźi, skoćo z pomocu powjazow z wody wućahnyć. Do toho bě wone z pastwy twochnyło a před po­mocnikami ćěkało, kotřiž chcychu je popadnyć. Při tym padny do rěki Nahe a nje­dósta so wjace z pruda.

Wustajeńca „Plastowy měšk, adej“ we Waldenburgu pola Stuttgarta pokazuje z něhdźe 50 000 plastowymi měškami kulturne stawizny tity, kotraž je ludźi minje­ne 50 lět přewodźała – w kupnicach, drastowych wobchodach abo po­litiskich stronach. Zdobom zamołwići na to skedźbnjeja, zo je čas plastowych titow bórze nimo, dokelž za zwjazkowej runinje jich zakaz přihotuja. Nic naposledk dokumentuja „błudnosć konsumoweho swěta“.

Anzeige