To a tamne (11.01.18)
Z kradnjenym wojerskim awtom je muž w sewjernej Ruskej njedaloko Murmanska cuze awto wobškodźił a na to do wukładneho wokna kupnicy jeł. Njewobrónjeny transporter bě wón do toho na ležownosći paramilitariskeho wukubłanišća pokradnył. Po puću do města zrazy wón do parkowaceho awta a přełama z rjećazowym jězdźidłom wukładne wokno. W kupnicy chcyše samo hišće blešu wina spakosćić. Policija wšak muža zaja, bjez toho zo by so wobarał.
W ćěłowym měše zaso wotućił je jaty w Španiskej. Do toho běchu lěkarjo, kotřiž chcychu jeho poprawom obdukować, smjerć muža zwěsćili. Dohladowarjo běchu jateho z módrym mjezwočom a bjez žiwjenskeho znamjenja w celi našli. Strach lěkarjow, zo móhli mozy muža předołho bjez kislika być, bě njewoprawnjeny: Wón prašeše so hnydom za swojej žonu.
To a tamne (10.01.18)
Ćěkańca po spadnej role při domje je so paduchej w Frankfurće nad Mohanom dospołnje nimokuliła. Wón padny z druheho poschoda a złama sej wjacore kosće. 27lětny bě so do běrowoweho twarjenja zadobył, při čimž aktiwizowaše alarmowu připrawu. W panice je z woknom won zalězł a spytał, po role ćeknyć. Ta pak so wułama a wopity muž padny do hłubiny.
Za wobchad njekmane nakładne awto je zwjazkowa policija na awtodróze A 4 pola Budyšina zadźeržała. Při Lkw-ju pobrachowaše jedne koleso. 40lětny šofer njebě skóncowane koleso wuměnił, ale měješe wósku bjez kolesa z pasami horje zwjazanu. Tak bě wón ze 14 tonami awtowych dźělow po puću. Policistam wšak napadny, zo so připowěšak strašnje na prawy bok chila. Na wotpočnišću pola Słoneje Boršće woni strašnu jězbu zakónčichu.
To a tamne (09.01.18)
Wot drogow zamućeny je 21lětny w badensko-württembergskim Haslachu policiju wołał, dokelž bě so pječa něchtó do jeho bydlenja zadobył. Zastojnicy wšak wčera rano žanoho paducha njenańdźechu, za to pak titku marihuany. Muž bě tak jara wot drogow wopojeny, zo zastojnikam přeradźi, zo ma tošku z dalšimi drogami pod łožom. „To bě jeho doskónčna zahuba“, policija piše.
Jenož w spanskim wobleku je so dwulětny pjerach w Bayerskej na rańše přechodźowanje podał. Při runje šěsć stopnjach bě hólčk w Landshuće jenož w nohajcach po puću a hižo wjetšu dróhu přeprěčił. Skónčnje wón pěškej napadny, kiž policiju alarmowaše. Ta podarmo za staršimaj hólca pytaše. Jako jeho do chorownje dowjezechu, dóńdźe informacija staršeju wo zhubjenym synku. Swójba bě w Landshuće na wopyće. Pjerach bě skradźu z bydlenja twochnył.
To a tamne (08.01.18)
Wo městno w rynku čakacych při kasy biłoj staj so mužej w předawarni delnjosakskeho Peine. 59lětny dźeržeše tam městno za swoju přećelku, čehoždla so dalši, 63lětny kupc na njeho wusypa. Po werbalnym rozestajenju dóńdźe k bijeńcy z pjasćemi. Jako so wobaj na zemi ležo pjerještaj, zawołachu ludźo policiju. Samo w nuzowej přijimarni chorownje chcyštaj so mužej dale bić. Přećiwo woběmaj policija nětko přepytuje.
Jenož nócnu košlu woblečenu je so šoferka nakładneho awta na parkowanišću w Mecklenburgsko-Předpomorskej sama z awta wuzamknyła. Durje běchu so same zamknyli, jako bě žona do spanja skrótka awto wopušćiła. Tak steješe 50lětna zymu mrějo w nocy na parkowanišću w Röbelu a prošeše policiju wo pomoc. Ta wokno nakładneho awta rozbi a durje na to wotewrě.
To a tamne (05.01.18)
Dospołnje nimokulił je so pospyt wodźerja w Mannheimje, ze swojim wulkim nakładnym awtom do wuskeje hasy wotbočić: Cyłkownje 23 parkowacych awtow wón při tym wobškodźi. Po informacijach policije je so Lkw při wotbočenju wjacorych awtow šmórnył. Jako spyta šofer wróćo storčić, sta so to samsne. Policija muža skónčnje zadźerža. Nakładne awto bě za jězdnju prosće přešěroke. Nastata škoda wučinja 20 000 eurow.
Milion eurow drohu blešu wodki je njeznaty w Kopenhagenje pokradnył. Při tym jedna so wo přewšo rědki eksemplar, kiž steješe w priwatnym składźe. Wobrazy wěstotneje kamery pokazuja zakukleneho muža, kiž blešu spakosći. Wona je tak droha, dokelž wobsteji z třoch kilogramow złota a třoch kilogramow slěbra. Bleša, požčonka z Ruskeje, njebě zawěsćena.
To a tamne (04.01.18)
Njesćerpny pasažěr w lětadle Ryanair je na lětanišću juhošpaniskeho města Malaga swojowólnje nuzowe durje wočinił a na křidło mašiny zalězł: 57lětny Polak bě prawdźepodobnje paniku dóstał, po tym zo njesmědźachu ludźo poł hodźiny po přizemjenju přeco hišće z mašiny. Personal móžeše muža skónčnje přerěčeć, zo so zaso do lětadła wróći. Policija pak Polaka na to nachwilnje sobu wza.
W kurioznej zwadźe wokoło kusateho wosoła a droheho sportoweho awta rěka wusud: Wobsedźer skoćeća dyrbi mějićelej sportoweho awta škodu 5 800 eurow zarunać, po tym zo bě wosoł před lětomaj w hessenskim Schlitzu do oranžoweho jězdźidła kusnył a lak wobškodźił. Na to su so wobdźěleni před Gießenskim krajnym sudnistwom dojednali. Kaž policija tehdy rozprawješe, bě drje wosoł awto za wulku morchej měł.
To a tamne (03.01.18)
Kruwa na kolijach je wčera rano železniski wobchad na čarje mjez Karlsruhe a Baselom zadźeržała. Ćěkajo před rěznikom bě howjado na kolije běžało a tam stejo wostało. Cyłkownje 14 ćahow měješe na to zapozdźenja. Hejatosć wšak kruwje ničo njepomhaše: Policija zawoła hajnika, kiž skoćo zatřěli. Čara Porynskeje železnicy je jedyn z najwažnišich sewjero-južnych zwiskow europskeho železniskeho wobchada.
K njewšědnemu njezbožu su policiju w šwabskim Pferseeju wołali: W tamnišej starowni bě wodźerka rolatora do muža zrazyła, kiž sedźeše w koleskatym stole. 68lětny so lochko na noze zrani a započa so z 83lětnej žonu wurěčować. Wusypa so na nju a ju ranješe, ćahaše ju za drastu a skónčnje ju samo drapaše a biješe, při čimž so nawoči žony złamachu. Policija přepytuje nětko přećiwo woběmaj: Jemu wumjetuja wotpohladne, jej lochkomyslne zranjenje ćěła.
To a tamne (02.01.18)
Jako dobry skutk chcyše Berlinjan swoju drogowu plantažu wusprawnić. Trjeba ju, zo by swójbu zežiwił, rjekny wón policiji. Ta bě 150 konopjowych rostlin w jeho bydlenju namakała. Susodźa běchu zastojnikow poprawom wótreje hudźby pola 31lětneho dla wołali. Jako pak woni jeho a dalšeho muža při braću drogow překwapichu, sej bydlenje bliže wobhladachu a nańdźechu plantažu.
W Jerusalemje je so tele dny 38lětna žona z wowku stała a někotre hodźiny pozdźišo sama trójniki porodźiła. Z nimi je wona nětko mać cyłkownje jědnaće dźěći. Jako bu 22lětny najstarši syn nan a jeje prěni wnučk w samsnej chorowni na swět přińdźe, bě rozpjeršenje wulke. Wšako bě wona hakle w 33. tydźenju samodruha a hrona běchu hižo zasadźili. Trójnikam, kotrež dyrbjachu wurězać, so derje dźe.
To a tamne (29.12.17)
Wulki woheń na sewjeru španiskeje dowoloweje kupy Mallorca je w běhu hodźin 75 hektarow lěsa zničił. Něhdźe 45 přisłušnikow wohnjoweje wobory, policije a ciwilneho škita je wčera dopołdnja płomjenja zhašało. Po oficialnych informacijach maja woni połoženje pod kontrolu. Woheń bě srjedu wječor z dotal njeznateje přičiny w horinach Tramuntana wudyrił. 60 chěžow dyrbjachu ewakuować. Wobydlerjo móžachu so mjeztym wróćić, kaž nuzowa słužba Balearow zdźěla.
Z wjerćiteho rěbla je wohnjowy wobornik w hessenskim Friedrichsdorfje swoju přećelku prosył so z nim zmandźelić, a bě wuspěšny. W košu rěbla jědźeše wón hač k třěšnemu woknu jeje domskeho a prošeše tam wo jeje „haj“. To pisa wohnjowa wobora na Facebooku. Njewšědna akcija wotmě so o sobotu do hód.
To a tamne (28.12.17)
Sněhowy wichor ze spěšnosću 144 kilometrow na hodźinu je kurjerku na ruskej kupje Sachalin z balkona zwěł, a to ze štwórteho poschoda. Na zbožo je 70lětna mjechko we wulkej wějeńcy „přizemiła“ a sej „jenož“ tři rjebła a ruku złamała. Dokelž pak njeje chorobne awto přez wulki sněh k njej jěć móhło, su žonu z kolesowym nakładowakom k lěkarjej dowjezli.
Hody su znate jako swjedźeń lubosće. Zo pak tomu přeco tak njeje, dyrbješe policija lětsa w porynsko-pfalcskim Koblenzu dožiwić. Hnydom dźewjeć razow mějachu zastojnicy hodowne swjate dny wšelake rozestajenja w swójbach wujednać, kaž tamniši policajski rěčnik wozjewi. Hłowna přičina rozdźělnych měnjenjow bě ta, zo běchu wobdźěleni sej do toho prosće přewjele alkoholiskich napojow popřeli. Zajeć pak policija nikoho njetrjebaše.
