To a tamne (28.09.15)

Montag, 28. September 2015 geschrieben von:

Zadwělowany přihladować dyrbješe 60lětny w Delnjej Frankskej, kak so jeho awto w rěce Mohanje tepi. Muž chcyše sobotu wječor po informacijach policije swój čołm z pomocu připowěšaka z rěki wućahnyć. Čołm pak wopokaza so jako přećežki a sćahny připowěšak kaž tež awto do rěki. Muž móžeše runje hišće z awta wulězć, prjedy hač so wone podnuri. Wohnjowa wobora drje je zaso wućahny, wěcna škoda pak njeje runjewon mała.

Njeprošeneho hosća dyrbješe policija wčera rano z bydlenja žony w Saarbrückenje wjesć. Měnjo, zo je pjany při bydlenskich durjach znaty jeje přećela, bě žona njeznateho njedźelu rano do bydlenja pušćiła. Tón pak dźěše runu smuhu do spanskeje stwy a so lehny. Jako so přećel nawróći, so wukopa, zo wón muža we łožu scyła njeznaje. Tón bě so prosće mylił a wo wopačne durje kłapał.

To a tamne (25.09.15)

Freitag, 25. September 2015 geschrieben von:

Chłóšćenkowe awtomaty za wopicy maja wot najnowšeho w Berlinskej co­ologiskej zahrodźe. Z nich móža sej wopicy słódne pelety wućahnyć – jeli to zdokonjeja. Za to dyrbja sej z kiješkow grat paslić a z jeho pomocu chłóšćenku z awtomata wućahnyć. Dalše pelety po wěstym časowym planje awtomatisce do chłóšćenkoweho kašćika padnu. Wulka lěpšina nowych nastrojow je: Wopicy su cyły dźeń zaběrane.

Nowy rekord spěšnosće awta chcedźa jendźelscy inženjerojo nastajić. Za to předstajichu wčera w Londonje wotpowědne jězdźidło Bloodhound. Awto, lěpje­ prajene lětadło na kolesach, ma hač do 1 600 km/h spěšne być. Dotalny rekor­d je 1 228 km/h. Nastajić chcedźa nowy rekord w Južnej Africe.

To a tamne (24.09.15)

Donnerstag, 24. September 2015 geschrieben von:

Mylnje z paduchom awta stał je so 66lětny w bayerskim Kreuthu. Nawróćiwši so z pjekarnje njezalěze wón do swojeho, ale do runje tak wupadaceho awta a z nim wotjědźe. Krótko na to přińdźe wobsedźer awta z pjekarnje a zawoła policiju. Padustwo pak so spěšnje jako misnjenje wukopa. Wobaj šěrej wozaj běštej pódla so stałoj. Nimo toho bě „wobkradnjeny“ klučik awta tčacy wostajił.

Wosebiteho jandźela pěstona měješe koala w Awstralskej. Po zražce z awtom bě wón dlěši čas w motorowej hawbje zatłusnjeny. Šoferka bě do njeho zajěła a hakle dźesać kilometrow dale w garaži widźała, zo zwěrjo hišće w awće tči. Koala bě zražku kaž tež razantnu jězbu z awtom derje přetrał. W Awstralskej dochadźa stajnje zaso k njezbožam z koalemi, dokelž so wone „njelepje“ zadźerža, kaž nowiny pisaja.

To a tamne (23.09.15)

Mittwoch, 23. September 2015 geschrieben von:

Mjerzanje ze sudnistwom hrozy mužomaj w Pólskej, kotrajž twjerdźitaj, zo staj ćah ze złotom němskich nacijow namakałoj. Nawodnica regionalneho zarjada za škit pomnikow je jeju mjeztym pola statneho rěčnistwa wobskoržiła. Wonaj běštaj njedaloko delnjošleskeho Wałbrzycha z pomocu radaroweho nastroja za ćahom­ pytałoj, njeměještaj pak žanu zarjadnisku dowolnosć. Skóržba nadźijomnje dalšich pytarjow wottraša.

Z mlokom woheń hašał je šofer mlokoweho nakładneho awta w delnjosakskim Bramsche. 41lětny bě wčera z awtom po puću, jako poča so zadnja wóska kurić. Bórze na to so wona paleše a wobruč so pukny. Šofer zasta, wotpušći štyri bowy mloka z tanka a tak woheń zhaša. Wohnjowa wobora jenož hišće wósku chłódźeše. Mloko do druheho awta wotklumpachu, zo móhli koleso wuměnić.

To a tamne (22.09.15)

Dienstag, 22. September 2015 geschrieben von:

Njewšědny narodninski dar je Marga­rete Erben z bayerskeho Kaufbeurena k stoćinam dóstała: jězbu do Libereca. Wona­ je tam hač do měrca 1945 bydliła – po tym pak město wopušći a so tak pozdźišemu­ wotsunjenju němskeho wo­bydlerstwa wuwiny. Na wopyće, organizowanym hromadźe z Liberecskej radnicu, su ju nětko hoberske změny napo­hlada města najbóle překwapili.

Prečćisnjene roztorhane pjenjezy staraja so w Darmstadće dale wo njeměr. Roztřihane­ a roztorhane dźěle eurobankowkow su woprawdźite pjenjezy, kaž poli­cija zdźěla. To je přepytowanje Zwjazkoweje­ banki wunjesło. Dotal su pjenjezy na 23 městnach w Darmstadće nama­kali. Při tym jedna so wo 500-, 100- a 50eurowki. Zdźěla ležachu wone na dróze­. Cyłkownje jedna so mjeztym wo nimale 20 000 eurow.

To a tamne (21.09.15)

Montag, 21. September 2015 geschrieben von:

Runje dźesać mjeńšin na swobodźe dyrbješe 58lětny hižo zaso do jastwa. Muža běchu minjeny pjatk pušćili. W samsnym času dóńdźe do bliskeje policajskeje straže wukaz zajeća přećiwo njemu, podhlada jebanstwa dla, kaž policija zdźěli. Zastojnicy muža njedaloko jastwa lepichu a hnydom zaso sobu wzachu.

Tójšto zapozdźenja zawinowała je skupina howjadow minjeny pjatk, jako stejachu wone na centralnej čarje spěšnikow mjez Kasselom a Fuldu. Wotrězk, na kotrymž tež spěšniki mjez Berlinom a Frankfurtom a Hamburgom a Frankfurtom jězdźa, bě mjez 19.35 a 21.05 hodź. zawrjeny. Zhromadnje z wobsedźerjom poli­cisća kruwy popadnychu. Spěšniki wšak dyrbjachu w tym času po druhich čarach jězdźić, štož wjedźeše k zapozdźenjam hač do 45 mjeńšin. K zražkam z howja­dami pak na zbožo njedóńdźe.

To a tamne (18.09.15)

Freitag, 18. September 2015 geschrieben von:

Zwrěšćena padušnica je w Brühlu pola Kölna nuzowe čisło woliła, dokelž bě so při­ zadobywanju přez wokno zraniła. Krawjaca sedźeše chětro natutkana 48lětna žona na łožu w domje, do ko­trehož bě so zadobyła. Při přetłóčenju wokna­ bě so wona wobsunyła a z nosom na woknowu desku zrazyła. Krawjaceho nosa dla pak so nastróži a zazwoni nu­zowe čisło 112 wohnjoweje wobory.

Park město parkowanišća: Po wšej Němskej su aktiwisća dźensa na parkowanišćach nachwilnje małe parki zarjadowali. Pozadk je mjezynarodny „par­k(ing) day“, kotryž wotměwa so tradicionelnje třeći pjatk septembra. Hdźež hewak awta steja, kładu wuměłcy, wob­- swětoškitarjo abo ludźo ze susodstwa kumštny trawnik a zarjaduja tam róžki k sedźenju. Akcije přewjedźechu mjez druhim w Berlinje, Stuttgarće, Mnichowje a Saarbrückenje. Při tym wabjachu tež za to, časćišo koleso wužiwać.

To a tamne (17.09.15)

Donnerstag, 17. September 2015 geschrieben von:

Do Běłeho domu we Washingtonje přeprosył je prezident USA Barack Obama 14lětneho Ahmeda Mohameda. Jeho bě policija póndźelu w šuli w texaskim Irvingu zajała a sputaneho wotwjedła, dokelž měješe wučerka samopasleny časnik hólca w tobole za bombu. „Cool časnik, Ahmed. Chceš jón do Běłeho domu přinjesć?“, Obama na Twitteru piše, „trjebamy wjace dźěći kaž tebje, kotrež so za wědomosć horja.“

Z planowanym zhromadnym kofejpićom je młoda žona-započatkarka poli­ciji wopodstatniła, čehodla je z awtom po bayerskim Chamje ze 111 km/h smaliła, byrnjež jeno 60 km/h dowolene było. Nimo toho njebě wona připasana. Nětko hroža jej chłostanje 160 eurow, měsac trajacy­ zakaz jězdźenja a dwaj dypkaj w Flensburgu. Nimo toho ju na dalekubłanje skazaja a pruwowanski čas podlěša.

To a tamne (16.09.15)

Mittwoch, 16. September 2015 geschrieben von:

Potajna zelena pruha je w Strasbourgskej katedrali Našeje knjenje wot jutři­šeho hač do spočatka nazymy widźeć. Swěći-li słónčko přez zeleny črij Jakuboweho syna Judy w mozaikowym woknje cyrkwje, pućuje pruha po Božim domje, wšědnje něšto wyše. 23. septembra w 12.24 hodź. docpěje wona najwyši staw nad Chrystusowej hłowu na klětce. Fenomen je Strasbourgski inženjer Maurice Rosart 1984 wo­pisał. Po jeho mě­njenju njeje to připad, ale wotpohlad.

Hłódne mjedwjedźatko je na šuli w Denveru alarm zawiniło a je sej, po tym zo bě so z pizzu nasyćiło, w składźe imbisoweho wobchoda wusło. Policija z Colorada Springs nadeńdźe młodźo na polcy mjez žiwidłami. „Njewšědny kupc za pizzowy wobchod“ pisaše policija na twitter, po tym je sobudźěłaćer lěsniskeho zarjada mjedwjedźatko wotewzał.

To a tamne (15.09.15)

Dienstag, 15. September 2015 geschrieben von:

Hrajkowe pistole, kotrež su prawym brónjam přewšo podobne, su w sewjerorynsko-westfalskim Tönnisvorsće zasadźenje policije zawinili. Do to běštaj so hólcaj w starobje dwanaće a 14 lět w awće dźěda a wowki z nowymi pistolemi hrajkałoj. Nimojěducy šofer zawoła policiju, dokelž měješe to za wohroženje. Dokelž awto tež hišće před banku parkowaše, přijědźechu hnydom wjacore policajske awta. Bórze so wukopa, zo jedna so jenož wo hrajki. Přiwšěm njesmědźa so w zjawnosći wužiwać. Dźěd a wowka staj zastojnikam pistole, kotrež běštaj wnučkomaj na hermanku kupiłoj, sobu dałoj.

Něhdyši zwjazkowy kancler Helmut Schmidt (SPD) njetrjeba po měnjenju swojeho lěkarja kurić přestać. „Njech dale pacha. Nima zmysła, jemu ze 96 lětami kurjenje wotwučić“, lěkar nowinarjam rjekny. Schmidta běchu před tydźenjomaj zatykaneje žiły dla operowali.

Anzeige