To a tamne (09.06.16)

Donnerstag, 09. Juni 2016 geschrieben von:

Na terasy hosćenca hnězdo natwariła je sej kačka w Frankfurće nad Wódru. Mjeztym třeće lěto wona na wulkim kwětkowym horncu hnězdźi, hdźež so po wšěm zdaću wěsćiša čuje hač w bliskim parku. Kačka Agatha njeda so mylić, ani wot wopytowarjow restawranta ani wot rjedźerkow. Jeno přimnyć so njeda. Picu za čas lehnjenja tež wotpokazuje. Loni bě tam dźesać pilatkow wulahnyła.

Wjećba dyrbi być! Tole rjekny sej 24lětna w schwabskim Günzburgu, po tym zo bě ju přećel wopušćił. Z pomocu rezerwoweho klučika wza sej wona awto 30lětneho a je w bliskim jězoru podnuri. Jako muž swoje jězdźidło njenamaka, informowaše policiju a móžeše tež móžnu skućićelku pomjenować. Njetrjebachu tuž dołho pytać. Wohnjowa wobora wućahny awto z jězora.

To a tamne (08.06.16)

Mittwoch, 08. Juni 2016 geschrieben von:

Trikot koparjow němskeho narodneho mustwa je zwjazkowa kanclerka Angela Merkel tuchwilu woblečena – znajmjeńša jako postawa w Berlinskim kabineće wóskowych figurow, kaž rěčnica kabineta zdźěli. Zo so to ludźom lubi, bě tele dny na fotowym terminje před Braniborskimi wrotami widźeć. Tójšto turistow je sej tam selfie z wóskowej kanclerku třěliło. Po europskich mišterstwach 10. julija dóstanje Angela Merkel zaso swój tradicionalny dwudźělny outfit.

Dobry čuch dopokazała je policija w Mnichowje. W rumnosćach jeje straže a starym měsće wonješe za marihuanu. Rozhladujo so po wokolinje wuhladachu zastojnicy třoch młodostnych na balkonje susodneho domu, kotřiž runje joint kurjachu. Při přepytowanju bydlenja namakachu marihuanu a utensilije. 26lětneho wobydlerja zajachu.

To a tamne (07.06.16)

Dienstag, 07. Juni 2016 geschrieben von:

Dorost w sakskim sejmje: W swójskim hnězdźenskim kašćiku su młodej pustawje (Turmfalken) wuhladali, kaž rěčnik sejma Ivo Klatte zdźěli. Mjeno nochcedźa jimaj dać. Doniž njemóžetej lětać, dóstanjetej pustawje „bjezfrakciski status“, Klatte přeradźi. Přichodny tydźeń budźe sejm wo tři pčolace ludy bohatši.

Dwójce w běhu dweju dnjow su dospołnje pjaneho šofera awta w Awstriskej lepili. 40lětny bě njedźelu po narodninskim swjedźenju do kontrole přišoł. Měrjenski nastroj pokazowaše rekordne pjeć promilow. Jězbnu dowolnosć muž dawno žanu wjace njeměješe. Póndźelu je policija šofera znowa kontrolowała. Tónkróć naměri dwaj promilej alkohola.

To a tamne (06.06.16)

Montag, 06. Juni 2016 geschrieben von:

Swój prěni skok z parašutom wuspěšnje zmištrowała je 90lětna ćěłozwučowarka Johanna Quaas z Halle. Po Guinnessowej knize rekordow je wona najstarša ćěło­zwučowarka swěta, kotraž so aktiwnje na wubědźowanjach wobdźěla. Při wčerawšim skoku bě jej swětowy mišter w ćěło­zwučowanju Eberhard Gienger jako tandem poboku. Wobaj startowaštaj w lětadle AN-2 z lětanišća Böhlen južnje Lipska a přizemištaj bjez problemow. Skok bě dar k 90ćinam Johanny Quaas.

Přewótreje hudźby dla je policija w Frankfurće nad Wódru sobotu rano studentski swjedźeń skónčiła a wótřerěčaki sobu wzała. Party w internaće njebě přizjewjena. Dokelž studenća po prěnim napominanju policije dale swjećachu, přijědźechu zastojnicy z wjacorymi awtami hišće raz. Tónkróć ludźi domoj pósłachu a wótřerěčaki sćazachu.

To a tamne (03.06.16)

Freitag, 03. Juni 2016 geschrieben von:

Štó sćele jěd ze Singapura? Muž z Lipska je so chětro nastróžił, jako pakćik z napisom „Gift“ z aziskeho měšćanskeho stata do domu dósta. Policiji wón rozpjeršeny rozłoži, zo sej pakćik wočinić njezwěri. Ta pak jeho při telefonje změrowaše: Gift je jendźelske słowo a woznamjenja „dar“.

Sewjerna Irska budźe europski koparski mišter – znajmjeńša, dyrbjała-li naj­wjetša koparska fachowča Němskeje prawje měć. Elefantka Zella wěšćeše dźensa w Stuttgartskim zwěrjencu z oraklom wotběh europskich mišterstwow w Francoskej, kotrež so dźensa za tydźeń zahaja. Za Němsku derje njewupada: Hižo prěnju hru přećiwo Ukrainje 12. junija mustwo Joachima Löwa přěhraje. Partija přećiwo Pólskej skónči so njerozsudnje. 49lětna Zella dyrbješe bule z barbami jednotliwych krajow z koša brać.

To a tamne (02.06.16)

Donnerstag, 02. Juni 2016 geschrieben von:

Jogger, kiž bě lac z přidatnymi ćežidłami woblečeny, je w Hamburgu wulkozasadźenje policije zawinił. Swědk bě muža z podhladnym lacom při dźěłowym zarjedźe wobkedźbował. Dokelž měješe jeho za atentatnika z rozbuchlinu při ćěle, alarmowaše policiju. Ta přijědźe z 30 awtami ­a cyłkownje 60 zastojnikami. Woni zwěsćichu, zo jedna so wo muža, kiž ma na dźěłowym zarjedźe swój běrow. Přidatne ćežidła měješe wón při ćěle, zo by sportowe wužadanje wjetše było.

13 000 eurow drohu skulpturu z lutych legoklockow je štyrilětny hólc w Chinje skóncował. Hólčk bě ze staršimaj wustajeńcu „Lego-expo“ na juhu kraja wopytał. Tam započa wón do figury, tak wulkeje kaž čłowjek, bić, na čož so konstrutk sypny. Twarcy wuměłskeje twórby su zamołwjenje staršeju akceptowali a sej žane wotškódnjenje nježadaja.

To a tamne (01.06.16)

Mittwoch, 01. Juni 2016 geschrieben von:

Awdiencu pola bamža dóstała je amtěrowaca Miss Germany, wučerka katolskeje nabožiny Lena Bröder. 26lětnej spjelni so tak „són žiwjenja“, rjekny wona powěsćerni dpa. Bamž Franciskus chce ju 15. junija we Vatikanje witać. Budźe to prěni króć scyła, zo bamž Miss Germany na awdiencu přijmje. Bröder, kotraž bě sej titul w februaru zdobyła, wuwučuje w Münsteru domjacnosć a katolsku nabožinu.­ Hakle na zjězdźe katolikow w Lipsku je wona za swoju wěru wabiła.

Za wodźidłom awta dźěćo ćěšiła je žona w Španiskej, na čož ju policisća zajachu Zastojnicy běchu 25lětnu zadźerželi, po tym zo bě na křižowanišću wopak wotbočiła. Hakle po tym wuhladachu dźěćo na klinje žony. Nimo toho zwěsćichu, zo njebě jězbna dowolnosć žony hižo płaćiwa. Wostanje tuž najprjedy raz w jastwje, zo bychu ju sudnikej předstajili.

To a tamne (31.05.16)

Dienstag, 31. Mai 2016 geschrieben von:

Z wunamakanej zběrku na dobro noweho kumštneho trawnika na sportnišću sewjerorynsko-westfalskeho Warsteina staj młodostnaj w starobje 13 a 15 lět spytałoj, kapsny pjenjez wuzbytkować. Jedyn z darićelow wšak so w sportowym towarstwje akcije dla naprašowaše, hdźež ničo wo njej njewědźachu. Jako muž młodostneju znowa při zběranju pjenjez lepi, jeju zadźerža a zawoła policiju. Staršemu hrozy nětko skóržba jebanstwa dla.

Z drogowym testom pola policije je 22lětny swojej přećelce w Kölnje dopokazać chcył, zo drogi njebjerje. Jědźeštaj tuž njedźelu na policajsku stražu w Sankt Augustinje, hdźež jemu přeće za testom spjelnichu: Tón pak wujewi, zo bě kokain brał, štož dyrbješe skónčnje při­znać. Dokelž bě pod wliwom drogow z awtom jěł, hrozy jemu nětko sudniske jednanje.

To a tamne (30.05.16)

Montag, 30. Mai 2016 geschrieben von:

Wjace hač 23 000 cigaretow chcyše swójba z Berlina z Pólskeje do Němskeje pašować, za čož wužiwaše dźěćacy wozyčk a wjacore kófry. Kaž policija zdźěli, su zastojnicy swójbu, porik z dwěmaj dźěsćomaj, w dwórnišćowej hali w Frankfurće nad Wódru kontrolowali. Pěškam běchu zdźěla derje widźomne cigarety napadnyli. Cyłkownje 114 tyzow po dźesać tyzkach pólskich cigaretow zastojnicy z wačokow wućahnychu.

K bijeńcy při wěrowanju je na stawni­stwje w Mannheimje dóšło, při čimž so přistajena stawnistwa zrani. Kaž rěkaše, njeběchu přiwuzni nawoženje z njewjestu spokojom. Na to dóńdźe na stawniskej žurli k bijeńcy. Přiwšěm so porik zmandźeli a swjećeše kwas bjez dalšich mylenjow. Přećiwo štyrjom podhladnym přepytuje policija nětko ranjenja ćěła a wobškodźenja wěcow dla.

To a tamne (27.05.16)

Freitag, 27. Mai 2016 geschrieben von:

Swoje olympiske złoto z lěta 2004 přisadźił je něhdyši čěski star dźesaćiboja Roman Šebrle. Bywšemu swětowemu rekordnikej pokradnychu medalju na šulskim sportowym zarjadowanju, hdźež bě ju wobdźělnikam golfoweho turněra pokazał­. To rozprawja dźensa portal sport.cz. 41lětny Šebrle přilubja spraw­nemu „namakarjej“ zhromadnu wječer a fotoknihu wo Olympiskich lětnich hrach 2004 w Athenje.

Wosrjedź nocy dźěłacy zahrodnicy su w Mainzu zasadźenje policije zawinili. Z pomocu kapsnych lampow kładźechu woni na zahrodźe trawnikowe maty. Susodźa mějachu jich za paduchow a wołachu policiju. Zastojnikam, kotřiž běchu z wjacorymi awtami přijěli, nócni dźěłaćerjo rozjasnichu, zo běchu so časowje zaličili a chcychu nadawk na kóždy pad dočinić, byrnjež hižo pozdźe było.

Anzeige