Módroćišć za načasne produkty wužiwać

Stare rjemjesła so tuchwilu po cyłej Europje a tak tež we łužiskim regionje wozrodźeja. Kreatiwna Zhorjelčanka Alena Macmillan wěnuje cyły swój angažement módroćišćej.

Kaž w dobrej stwě swojeje wowki čuju so pola Iana a Aleny Macmillan w Zhorjelcu, njedaloko dwórnišća na Jaworničanskej dróze 3. Přetož zarjadowana je rumnosć z blidom a stólcami, kotrež dopominaja mje na zašłe časy. Blido je pokryte z drohoćinkami, ale nic tajkimi, kotrež­ do škleńčaneje witriny słušeja. Cyle nawopak, su to ručne toboły, šaty, bluzy a dalše wudźěłki z módroćišća. A nimale kóždy ma hinaši muster. Čakaja jenož na to, zo bychu je ludźo kupowali. Tež wšelake zawki, přikrywy za blida abo měški za chlěb a całty so poskićeja, sej swoje bydlenje porjeńšić. Na wšitkich wudźěłkach je přičinjene připowěšatko z mjenom labela Dilian. Jednotliwe módrobarbne pismiki wjaza čerwjena sekla na běłej podłoze. Barby to, kotrež wudźěłki Aleny Macmillan charakterizuja.